धनगढीमे कृषि मार्ट संचालन
पहुरा समाचारदाता
धनगढी, १८ माघ । किसानहुकनहे व्यवसायिकरण कराके उत्पादनमे समावेश करैटी उपभोक्ताहुकनहे स्वास्थ्यकर ओ गुणस्तरीय खाद्य सामग्री उपलब्ध कराइक लाग धनगढीमे एस.बी कृषि मार्ट संचालनमे आइल बा ।
उ मार्टके उदघाटन सुदूरपश्चिम प्रदेशके प्रदेश प्रमुख देवराज जोशी करले रहिट । कृषि मार्ट संचालनमे आइल कृषकहुकनके सहजुल हुइनाके साथे स्थानीय उत्पादन बजार पैना बटैलै ।
एस.बी कृषि मार्टके प्रमुख विष्णु बुर्लाकोटी किसानहुकनहे आवश्यक विउ, विजन, मलखाद तथा मेसिन सहज ओ सुलभ मोलमे पैना बटैलै ।
मार्टसे आग्र्यानिक टिना ओ फलफुल उपलब्ध कैनामे प्रोत्साहन करटी उपभोक्ताहुकनहे सहज ओ सुलभ मोलमे उपलब्ध कैना, कृषि ओ भेटरिनरी सम्बन्धी कृषकहुकनहे समय समयमे परामर्श सेवा उपलब्ध करैना, लोप हुइटी रहल स्थानीय परिकारके स्वस्थ्यकर खाजा ओ खाना पारिवारिक वातावरणमे सेवा प्रदान कैना बुर्लाकोटी बटैलै ।
मार्टमे विउविजन खरिद विक्री वितरण, वित्र सेवा, कृषि तथा भेटरिनरी औजार उपकरण तथा मेसिनरीहुकनके वितरण, ताजा टिना तथा फलफूल विक्री वितरण, कृषि उत्पादनहुकनके विक्री वितरण, फ्रोजन मिट तथा मच्छरी विक्री वितरण, कृषि तथा वन लघुउद्यम घरेलु उद्योगसे उत्पादित हस्तकलाके सामाग्री विक्री वितरण, आग्र्यानिक ताजा टिना तथा खाद्य सामाग्रीके आइपिएम प्रविधिद्वारा विक्री वितरण, डेरी परम्परागत तथा स्थानीय खाजा ओ खानाके प्रबन्धके लाग क्याफटेरिया संचालन, तालिम तथा सेमिनार हल, परम्परागत ज्ञान ओ प्राविधिसहितके कृषि संग्राहलय स्थापना हुइल बटैलै ।
मार्ट उदघाटन कार्यक्रममे प्रतिनिधिसभा सदस्य डिल्लीराज पन्त, सुदूरपश्चिम प्रदेश कृषि सचिव मदनसिह धामी, कैलाली उद्योग वाणिज्य संघका कार्यकारी निर्देशक गोमा आचार्य, नेपाल पत्रकार महासंघ कैलालीके अध्यक्ष हिमालय जोशी लगागत शुभकामना मन्तव्य व्यक्त करल रहिट ।
