उद्यमशिलता विकास तालिम सम्पन्न

पहुरा समाचारदाता
हसुलिया, १८ माघ । कैलारी गाउँपालिकाके आर्थिक सहयोगमे संचालन हुइल ८ दिने उद्यमशिलता विकास तालिम सम्पन्न हुइल बा ।

गरिबी निवारणका लागि लघु उद्यम विकास कार्यक्रम मेड्पा अन्तर्गत वडा नम्बर ५ ओ ७ मे आठ दिवसिय तालिमके आयोजना हुइल रहे । तालिम समापन कार्यक्रम कैलारी गाउँपालिकाके उपाध्यक्ष भगवतीकुमारी चौधरीके वडका पहुनामे हुइल रहे । कार्यक्रममे सम्बोधन करटी उहाँ गाउँपालिकासे वेरोजगार यूवाहुकनहे स्थानीय गाउँमे ठाउँमे रोजगारी सृजना करेक लाग तालिमके आयोजना करल बटैली । यूवाहुकन तालिम लेके उद्यम ओर लग्ना बटैली ।

उद्यमशीलता विकास तालिम समापन कार्यक्रम वडा नम्बर ५ के वडा अध्यक्ष विष्णु प्रसाद चौधरीके अध्यक्षतामे हुइल रहे । कैलारी गाउँपालिका वडा नं ५ मे ४२ जाने ओ वडा नम्बर ७ मे ४३ करके जम्मा ८५ जाने तालिममे सहभागी हुइल लघु उद्यम विकास शाखाके प्रमुख प्रदीप चौधरी बटैलै ।

तालिम समापन कार्यक्रममे कार्यपालिका सदस्य मनिराम कुमाल, उद्यम सहजकर्ता निर्मला चौधरी, गाउँपालिका उपाध्यक्षके स्वकीय सचिव कृष्ण चौधरीलगायतके सहभागिता रहे । तालिम यिहे माघ १० से १८ गतेसम संचालन हुइल रहे ।