स्वस्तिक हस्पिटलके स्वास्थ्य सेवा सुरु

पहुरा समाचारदाता
धनगढी, १८ माघ । धनगढीके चटकपुरमे स्वस्तिक कार्डियो एण्ड मल्टिस्पोसियालिटी हस्पिटलसे अपन सेवा सुरु करले बा ।
सुदूरपश्चिम प्रदेशमे हालसम उपलब्ध नइरहल स्वास्थ्य सेवा सहितके विशेषज्ञ सेवा बुधसे अस्पतालमे सुरु हुइल हो ।

अस्पतालसे ईमरजेन्सी, फार्मेसी, प्रयोगशाला सहितके कुछ विशेषज्ञ सेवा सुरु करले बा । बाँकी विशेषज्ञ सेवा फे हाली सञ्चालनमे नन्ना अस्पतालके अध्यक्ष महेश जोशी जानकारी डेलै ।

२५ शैय्याके अस्पतालमे आईसियू, एनआईसियु, पिआईसियु, सिटि स्क्यानके साथे हाडजोर्नी तथा नशारोग विशेषज्ञ, फिजियोथेरापी विशेषज्ञ, जनरल तथा दुरविन प्रविधिसे सर्जरी विशेषज्ञ, मेरुदण्डके जटिल शल्यक्रिया विशेषज्ञ, जनरल मेडिसिन (पेट, छाती, मुटु, सुगर, प्रेसर) विशेषज्ञ, नाक, कान, घाटी रोग विशेषज्ञ, रेडियोलोजिष्ट, किड्नी रोग विशेषज्ञ, मानसिक रोग विशेषज्ञ, दन्तरोग विशेषज्ञ, युरोलोजी लगायतके विशेषज्ञ सेवा सञ्चालनमे आइल बटै । यकर साथे यी क्षेत्रमे नइहुइल मुटु ओ क्यान्सर रोगके साथे टेष्ट ट्युव वेबी ओ प्लाष्टिक सर्जरी सेवाहे धनगढीमे नानल अस्पतालसे यी सेवाफे सञ्चालनके तयारीमे रहल जनैले बा ।

मुटुरोग ओ क्यान्सर रोग सम्बन्धीके विशेषज्ञ सेवा ओ जटिल प्रकृतिके शल्यक्रियाके लाग अन्यत्र जाई पर्ना बाध्यता रहटी आइलमे अब यी सेवाफे धनगढीमे पैना ओ उ सेवा सुचारु करेक लाग काम हुइटी रहल अस्पतालके अध्यक्ष जोशी बटैलै । अस्पतालमे दुर्घटनामे घाहिलहुकनके सहज उपचारके लाग ट्रामा ईमरजेन्सी कक्ष बनाइल बा । जौन कक्षभिटर अलग्गे शल्यक्रिया कक्ष, आईसियु ओ भेन्टिलेटरके व्यवस्था करल बा । यी सेवाफे सुरु हुइना अवस्थामे पुगल बा । ट्रामा ईमरजेन्सी कक्ष सञ्चालनमे आइलपाछे दुर्घटनामे घाईतेहुकनके अकालमे ज्यान गुमैना अवस्था ओ थप उपचारके लाग अन्यत्र जाई नइपरी । मुटु ओ क्यान्सर रोगके केल नाही प्लाष्टिक सर्जरी, टेष्ट ट्युव बेबी सहितके और सक्कु विशेषज्ञ सेवा सहित अस्पताल सञ्चालनके योजना अनुसार हालहे कुछ विशेषज्ञ सेवासे सुरुवात करल ओ क्रमशः सक्कु विशेषज्ञ सेवा थप्टी लैनैना जोशी बटैलै ।

अस्पतालमे मुटुके भल्भ बन्द हुइल पत्ता लगैना एबीपि, टिएमटी हल्टर सेवा, स्तनके क्यान्सरके रोग पत्ता लगैना म्यामोग्राम सेवा, दाँतके अत्याधुनिक एक्सरे (ओपीजी) सेवा, टेष्ट ट्युब बेबी÷आईभिएफ तथा अंकोलोजी सेवाफे डेना बा । जिहीसे यहाँके विरामी लाभान्वित हुइना अपेक्षा अस्पतालसे रख्ले बा । उ उपचार सेवा पाइक लागफे महँगा शुल्क तिरे नइपर्ना स्वस्तिक कार्डियो एण्ड मल्टिस्पोसियालिटी हस्पिटलके अध्यक्ष जोशी बटैलै ।

अस्पतालके अपने अक्सिजन प्लान्ट समेत रहल बा । अस्पतालमे शल्यक्रिया करेक लाग विश्व स्तरीय मोडुलर अप्रेशन थियटर तयार पारल बा । यी प्रकृतिके शल्यक्रिया कक्ष पश्चिम नेपालके पहिल रहल अस्पतालके दावी बा । ‘यैसिन शल्यक्रिया कक्ष बुटवलसे पश्चिममे नइहो । स्तनके क्यान्सरके रोग पत्ता लगैना म्यामोग्राम सेवाफे पश्चिम नेपालके पहिल हो ।’ अध्यक्ष जोशी कहलै । अस्पतालमे अत्याधुनिक शव गृहफे निर्माण करल बा । जेम्ने बर्षौसम शवहे सुरक्षित धारे सेक्जाई । यी सेवा अन्य स्वास्थ्य संस्थाहुकनहे उपलब्ध करैना अस्पताल जनैले बा ।

अस्पतालसंग पर्याप्त ठाउँहुक्रे रहल बा । झण्डै दुई विगाहसे ढेर क्षेत्रफलमे फैलल अस्पतालमे ५१ हजार स्क्वायर फिटमे संरचना निर्माण करल बा । सक्कु स्वास्थ्य उपचार सेवा पाईक लाग अलग अलग विभाग बनाइल बा । अस्पतालमे अइना विरामीहुकनहे केल नइहुके ओइनके कुरुवाके लाग विशेष व्यवस्था करल बा । कुरुवाहुकनहे वास ओ खानाके व्यवस्थाफे अस्पतालमे मिलाइल बा । ओस्टेक करके लकर सुविधाफे अस्पतालमे पैना बा । अस्पतालके नयाँ ओ अत्याधुनिक सुविधा थप्टी उत्कृष्ट स्वास्थ्य प्रदान कैना लक्ष्य रहल अस्पतालके अध्यक्ष जोशी बटैलै ।