स्टेपिङ स्टोन डीसीए कप च्याम्पियन

पहुरा समाचारदाता
धनगढी, १९ माघ । स्टेपिङ स्टोन इंग्लिस बोर्डिङ स्कुलसे दीपेन्द्र स्वाँर मेमोरियल डीसीए कप क्रिकेट प्रतियोगिताके उपाधि जिटले बा । फाप्ला क्रिकेट मैदानमे बुधके हुइल फाइनलमे लिटिल फलवार स्कुलहे १० रनसे पराजित करटी स्टेपिङ च्याम्पियन बनल हो ।

टस जिटके पहिल ब्याटिङ करल स्टेपिङसे निर्धारित २० ओभरमे ९ विकेट गुमाके १०९ रन बनाइल रहे । स्टेपिङके लाग किरण धामीसे सर्बाधिक ३४ रन बनैलै । २३ बलमे उहाँ ७ चौका प्रहार करलै । ओस्टेक अभिशेक खड्कासे २६ बलमे २३ रन बनैलै । उहाँ एक चौका ओ एक छक्का प्रहार करलै । उ बाहेक समिर कुँवर ५ बलमे २ चौकासहित १० रन जोरलै ।

बलिङओर लिटिल फलवारके कुशल धामी ३ तथा आर्यन धनपाली ओ किरण धामी समान २–२ विकेट लेलै ।
जवाफफे लिटिल फलवारसे निर्धारित २० ओभरमे ९ विकेट गुमाके ९९ रनकेल बनाई सेक्लै । ओकर आशिष साहु २९, सुबोध तिवारी १३ तथा आरिस बोहरा १२ रन जोरलै । स्टेपिङके अनुराग सिंह ३ तथा सचिन भट्ट २ विकेट लेलै ।

प्रतियोगिताके विजेता स्टेपिङ ५० हजार नगद पाइल कलेसे उपविजेता लिटिल फलवार ३० हजार पाइल ।
प्रतियोगिताके सर्वोत्कृष्ट खेलाडी स्टेपिङके कुशल धामी चुन्लै । उहाँ ५ हजार नगदसहित डीसीएमे ४ महिनाो छात्रवृत्ति पैलै ।
ओस्टेक उत्कृष्ट ब्याटर लिटिल फलवारके अनुराग सिंह चुन्लै । उहाँ ३ हजार नगद ओ ३ महिनाके छात्रवृत्ति पैैलै ।
उत्कृष्ट बलर लिटल फलवारके सचिन भट्ट चुन्लै । उहाँफे ३ हजार नगद ओ ३ महिनाके छात्रवृत्ति पैलै । उदयमान खेलाडीके अवार्ड फे लिटिल फलवारके रोशन रावल पैलै । उहाँ क्रिकेट शुज पैलै ।