सांसद अरुणकुमार चौधरी पक्राउ

काठमाडौं, १९ माघ । कैलाली क्षेत्र नम्बर २ से निर्वाचित सांसद अरुणकुमार चौधरी पक्राउ परल बटै ।
ट्याक्टरमे आगी लगाइल आरोपमे उहाँक उप्पर जिल्ला अदालत कैलालीसे ६ महिना कैद सजाय ओ ८ लाख १९ हजार रुप्या भरैना फैसला हुइल रहे । उ फैसला कार्यान्वयनके लाग उहाँहे बाँकेके कोहलपुरसे पक्राउ करल प्रहरी प्रवक्ता डीआईजी पोषराज पोखरेल जानकारी डेलै ।

२०७४ सालमे लम्कीचुहा नगरपालिकाके मेयर ओ पाछे प्रदेश निर्वाचनमे पराजित चौधरी गैल अगहनमे निर्वाचनमे नागरिक उन्मुक्ति पार्टीसे कैलाली–२ से प्रतिनिधि सभा चुनाव जिटल रहिट ।

कैलालीके गोराङगे खोलासे ढुंगा लेके लम्की जैटी रहल ट्याक्टरमे ३ भदौ २०६६ मे आगजनी हुइल रहे । ट्याक्टरधनी मोतीपुरके महादेव बजगाईं अपन ट्याक्टरमे आगी लगाइल कहिके पर्शुराम चौधरी, अरुण चौधरी ओ वीरबहादुर चौधरीविरुद्ध उजुरी डेहल रहिट । उहाँ ८ लाख ७५ हजार रुप्या क्षतिपूर्ति पाई पर्ना दाबी करले रहिट ।

९ वैशाख २०७० मे पर्शुराम चौधरी, अरुण चौधरी ओ वीरबहादुर चौधरीहे ६÷६ महिनाके दरसे कैद सजाय तोकल रहे । क्षति हुइल ८ लाख १९ हजार रुप्या तीन जनहनसे भरैना आदेश हुइल रहे । दोषी ठहर मन्से वीरबहादुर चौधरी भर गैल शुकके पक्राउ परल रहिट ।