साथी मार्टके शाखा हसनपुरमे संचालन

पहुरा समाचारदाता
धनगढी,२० माघ । धनगढी उपमहानगरपालिका–५, पिपलचौतारमे साथी मार्टके शाखा सञ्चालनमे हुइल बा ।

युवा व्यवसायी प्रकाश शाह ओ मेखराज भट्टसे एक करोड रुप्या लगानीमे मार्ट सञ्चालनमे नानल हुइट । मार्टमे शुकके रोज कारोबार सुरु करल बा । साथी मार्टके यी एक सय १९ औँ शाखा रहल सञ्चालक शाह बटैलै ।

हसनपुर, जाइ, मटियारी, तारानगर क्षेत्रके ग्राहकके सुविधाके लाग हसनपुर पिपल चौतारामे मार्ट सञ्चालनमे नानल शाह बटैलै । सञ्चालक शाहके अनुसार मार्टमे पाँच जाने रोजगारीके अवसर पैले बटै । मार्टमे खाद्यान्न, सक्कु प्रकारके दैनिक उपभोग्य बस्तु, भाँडाकुडा, स्टेशनरी, कस्मेटिक, पेय पदार्थलगायत गुणस्तरीय सामान सुलभ मूल्यमे उपलब्ध रहल दुसर सञ्चालक भट्ट बटैलै ।

व्यवसायसंगे ग्राहकहे भान्सामे चहना सक्कु सामान एक्के छाना टरे पैना सेवा डेना मार्ट सञ्चालनमे नानल उहाँ बटैलै ।
ग्राहकसे सामानके लाग फरकफरक पसलमे भौतारे नपरे कना उद्देश्यसे एक्के छाना टरे सक्कु मेरिक सामान खरीद करे सेक्ना व्यवस्था मिलाइल सञ्चालक बटैले बटै ।

उद्घाटनके अवसरमे मार्टमे टमान सामानमे २५ प्रतिशतसम विशेष छुटके व्यवस्था करल बा । साथी मार्टके अपने उत्पादनमे २५ प्रतिशत, भान्सा तथा गिफ्ट आइटममे १५ प्रतिशत ओ किराना तथा पेय पदार्थमे पाँच प्रतिशत छुटके व्यवस्था करल सञ्चालक भट्ट जानकारी डेलै । साथी मार्टसंगके फ्रेञ्चाईजमे सुदूरपश्चिममे टमान व्यक्तिके लगानीमे धनगढीके चटकपुर, उत्तरबेहडी ओ मिलनचोक, गोदावरीके स्याँउले तथा दार्चुलामे समेत मार्ट सञ्चालनमे बटै ।