नाष्ट कलेजके २३औं बार्षिकोत्सव
‘गुणस्तरीय ओ प्राविधिक शिक्षामे महत्वपूर्ण भूमिका’
पहुरा समाचारदाता
धनगढी, २० माघ । नेशनल एकेडेमी अफ साइन्स एण्ड टेक्नोलोजी (नाष्ट) से २३औं वार्षिकोत्सव तथा अभिभावक दिवस मनैले बा ।
सुदूरपश्चिम प्रदेशके प्रदेश प्रमुख देवराज जोशीके वडका पहुनामे हुइल कार्यक्रममे उहाँ नाष्ट कलेजसे गुणस्तरीय ओ प्राविधिक शिक्षामे महत्वपूर्ण भूमिका निर्वाह करल बटैलै । अब्बेक आवश्यकता प्राविधिक शिक्षा हो, प्रदेश प्रमुख जोशी कहलै, ‘यी कलेजसे समय सुहैटी शिक्षा लागु करल ओरसे विद्यार्थी ओ अभिभावकके आर्कषण बह्रल बा ।’ समाजहे परिवर्तन करेक लाग गुणस्तरीय शिक्षा आवश्यक रहल उहाँ बटैलै ।
कलेजके प्रबन्ध निर्देशक शिवहरि मुडभरी विद्यार्थी ओ अभिभावकके सहयोगसे नाष्ट कलेज यी ठाउँमे पुग्न सफल हुइल ओरसे गुणस्तरीय शिक्षा प्रदान कैना कलेजपाछे नइपर्ना बटैलै ।
कार्यक्रममे पूर्व सासद महेश्वर पाठक, अभिभावक डिल्लीराज शर्मा, पंकज अग्रवाल, नेशनल एकेडेमी अफ साइन्स एण्ड टेक्नोलोजीके प्रचार्य प्रेम बहादुर चन्द, एसपिए कलेजके प्रमुख योगराज उपाध्याय, ऐश्वर्य कलेजके प्रमुख प्रेमनिधि ओझा, सुप विश्व विद्यालयके पुर्व रजिष्टार तथा नाष्ट कलेज व्यवस्थापन समितिके सदस्य डा. हेमराज पन्त, नाष्ट माविके प्रचार्य उपेन्द्रबहादुर बम, कक्षा १२ विद्यार्थी स्मृति शाही, वि.ई सिभिल सातौंके विद्यार्थी भाष्कर जोशी लगायत मन्तव्य व्यक्त करले रहिट ।
नेशनल एकेडेमी अफ साइन्स एण्ड टेक्नोलोजीके संस्थापन व्यवस्थापन समितिके अध्यक्ष डा.मुक्तिनाथ पन्तके अध्यक्षतामे हुइल कार्यक्रममे टमान विधामे उत्कृष्ट मेधावि एवम् खेलाडी विद्यार्थीहुकनहे सम्मान सहित पुरुस्कार वितरण समेत करल रहे ।
बार्षिकोत्सवके अवसरमे दिर्घराज पाध्यायसहितके कलाकारसे स्वागत गित, खुशी ठाकुरसहितके कलाकारसे यो नेपाली शिर उचाली गितमे नृत्य, सुप्रिया देउवासहितके कलाकारसे गढवाली सांस्कृतिक प्रस्तुती, स्मृति भण्डारीसहितके कलाकारसे तमाङ सांस्कृति प्रस्तुती करले डेखैले बटैं ।
कलेजके प्रवन्ध निर्देशक शिवहरि मुडभरी शर्मा सक्कु समुदायके कला संस्कृतिहे जर्गेना कैना प्रयास करल बटैलै । वार्षिकोत्सवके अवसरमे सुष्मा शर्मासहितके कलाकारहुक्रे ‘सय थरी बाजा…’मे नृत्य, निरुता चौधरीसहितके कलाकारहुक्रे थारु सांस्कृति प्रस्तुतीकरण, स्मृति शाहीसहितके कलाकारहुक्रे मगर सांस्कृतिक प्रस्तुती, रञ्जना पन्तसहितके कलाकारसे चोलि राम्रो पल्पाली ढाका टोपीमे सांस्कृतिक प्रस्तुती, सुनिता सोवसहितके कलाकारसे नेवारी सांस्कृतिक प्रस्तुती प्रस्तुत करल रहिट ।
ओस्टेक करके हेमा ओझासहितके कलाकारसे गुरुङ सांस्कृतिक प्रस्तुती, रिचा सुरीसहितके कलाकारसे ‘डोली चढाई लैजान्या हो..’मे सांस्कृतिक प्रस्तुती, आशा सिंहसहितके कलाकारसे थारु सांस्कृति प्रस्तुती, उषा जोशीसहितके कलाकारसे गुरुङ सांस्कृतिक प्रस्तुती ओ पूजा रावल सहितके कलाकारसे सांस्कृति प्रस्तुती डेखैले बटै । कार्यक्रम संचालन नवराज जोशी, हरेन्द्र विक्रम शाह ओ लिला पनेरु करले रहिट ।
