नेपाल शिक्षक संघ कैलारीके दुसरा अधिवेशन
पहुरा समाचारदाता
हसुलिया, २२ माघ । कैलाली जिल्ला कैलारी गाउँपालिका स्तरीय नेपाल शिक्षक संघके दुसरा अधिवेशन शनिच्चरके रोज हसुलियामे सम्पन्न हुइल बा ।
नेपाल शिक्षक संघ कैलारी गाउँपालिका अध्यक्ष मदन प्रसाद पौडेलके अध्यक्षतामे हुइल कार्यक्रममे वडका पहुना नेपाल शिक्षक संघ सुदूरपश्चिम प्रदेशके उपसचिव प्रेमबहादुर शाही रहल रहिट । कलेसे विशिष्ट पहुना कैलारी गाउँपालिका अध्यक्ष राजसमझ चौधरी ओ नेपाल शिक्षक संघके प्रदेश सदस्य मीना बोहरा रहल रहिट ।
उदघाटन कार्यक्रममे बोल्टी वडका पहुना नेपाल शिक्षक संघ सुदूरपश्चिम प्रदेशके उपसचिव प्रेमबहादुर शाही संघहे बल्गर बनैटी लैजाई पर्ना बटैलै । संघके दुसरा अधिवेशनके सफताके शुभकामना व्यक्त करटी लौवा कार्य समिति चयन प्रक्रियाहे चुनाव नइकरके सर्व सम्मतसे कैना आग्रह करल रहिट ।
कार्यक्रमके विशिष्ट पहुना गाउँपालिका अध्यक्ष राजसमझ चौधरी शिक्षकहुकनसे पेश करल मागप्रति अपने सकारात्मक रहल बटैलै । गुणस्तरीय शिक्षाके लाग गाउँपालिका लागल सदैव लागल कहटी शिक्षकहुकनके माग पाँच बरसे कार्यकालमे पुरा प्रतिवद्धताफे उहाँ जनैलै ।
नौ जाने सम्मानित
दुसरा अधिवेशनके अवसरमे संघसे नौ जनहनहे सम्मान करले बा । जेम्ने सेवा निवृत दुई जाने, कार्यसमिति छ जाने ओ शिक्षण पेशामे रहल मृत्यु हुइल एक जाने रहल बटैलै ।
सेवा निवृतपाछे सम्मानित हुइलमे माया चौधरी (छिमानन्द आधारभूत विद्यालय हसुलिया, परशुराम चौधरी (जनकल्याण आधारभूत विद्यालय कैलारी गाउँ रहल बटै । गोरख नेपाली शिक्षण पेशामे रहेबेर देहान्त हुइल रहे । उहाँके परिवारहे बोलाके मरनोउपरन्त सम्मानपत्र डेगिल बा ।
कार्यसमितिमे रहल सोनुराम चौधरी (रामजाननकी प्रावि के गाउँ, रिमा चौधरी (छिमानन्द आधारभूत विद्यालय, लिला चौधरी (दिपेन्द्र मावि हसुलिया, अनिता चौधरी (शिवशक्ति आधारभूत विद्यालय बनकन्द्री, सुरेन्द्रचन्द्र महतो (जनता आधारभूत विद्यालय मनाउँ, पार्वती चौधरी (जनसृजना प्रावि जमनीपुर गदरिया रहल बटै । बन्द शत्रमे वार्षिक प्रतिवेदन निवर्तमान सहसचिव आशाराम कुश्मी ओ वार्षिक आयव्यय विवरण निवर्तमान सचिव फुलराम चौधरी प्रस्तुत करले रहिट ।
संघके लौव अध्यक्षमे सन्तोषकुमार चौधरी
उदघाटन कार्यक्रमके अध्यक्ष तथा नेपाल शिक्षक संघ कैलारीके अध्यक्ष मदन प्रसाद पौडेल गुणस्तरीय शिक्षामे ध्यान डेटी संघहे बल्गर बनाके लैजाई पर्ना बटैलै । लौवा कार्यसमिति चयन करक लाग चुनावमे गैलेसे संघभिटर एक आपसमे द्वन्द सृजना हुइना बटैलै । सर्वसम्मतसे जाई परठ बाट रख्टी उहाँ अध्यक्ष पद हस्तान्तरण करल रहिट ।
संघके दुसरा अधिवेशन सर्व सम्मतसे सन्तोषकुमार चौधरीके अध्यक्ष्तामे लौव कार्यसमित चयन हुइल बा । संघके उपाध्यक्षमे विना चौधरी, गौरीशंकर चौधरी, सचिवमे पुरनबहादुर चौधरी, वृक्षलाल चौधरी, सहसचिवमे रिमा चौधरी रहल बटै । ओस्टेक करके सदस्यमे डम्मर शाह, बाबुराम चौधरी, मायारानी चौधरी, सोनुराम चौधरी, कमलाकुमारी चौधरी, हेमन्त बखरिया लगायतके रहल बटै ।
संचालक जनकल्याण मावि पवेराके शिक्षक गोरखनाथ ओ स्वागत मन्तव्य निवर्तमान उपाध्यक्ष अनिता चौधरी करले रहिट । संघके दुसरा अधिवेशन कार्यक्रममे कैलारी गाउँपालिलका वडा नम्बर १ के अध्यक्ष धोजहरिपाल बोहरा, वडा नम्बर ५ अध्यक्ष विष्णु प्रसाद चौधरीलगायत शिक्षकके सदस्यहुकनके सहभागिता रहे ।
