रेशम चौधरीके मुद्दामे प्रत्यर्थी झिकैना आदेश

पहुरा समाचारदाता
काठमाडौँ, २२ माघ । नागरिक उन्मुक्ति पार्टीके नेता रेशमलाल चौधरीके मुद्दामहे प्रत्यर्थी झिकैना सर्वोच्च अदालतसे आदेश डेले बा ।

अँटवार न्यायाधीशद्वय टंक बहादुर मोक्तान ओ मनोजकुमार शर्माके संयुक्त इजलाससे प्रत्यर्थी झिकैना आदेश डेहल हो । सर्वोच्चके आदेशसंगे अब रेशमलाल चौधरी लगायतसे विपक्षी बनाइलहुकनफे सर्वोच्च अदालतमे आइ पर्ना हुइल बा । यी मुद्दाके सुनुवाइके लाग अशरा लग्टी रहल रेशम चौधरी लगायतके कैदीबन्दीके पक्षमे सर्वोच्च अदालतसे प्रत्यर्थी झिकैना आदेश डेहल हो । प्रत्यर्थी झिकैना आदेशसंगे यी मुद्दामे आब पुनः बहस तथा सुनुवाइ हुइना ओ मिसिलके अध्ययनसंगे प्रमाणके मूल्याङकन कैना काम हुई ।

हालसम ४ चो पेसीमे चह्रल चौधरीके मुद्दा दुई चो हेरे नइमिल्ना न्यायाधीशके बेञ्चमे परल रहे । एक साताआघे पेसीमे चह्रलेसेफे उ बेला अदालतसे स्थगित करल रहे । अँटवार पेसी सूचीमे चह्रके १० औँ नम्बरमे रहल मुद्दामे प्रारम्भिक सुनुवाइ हुके प्रत्यर्थी झिकैना आदेश हुइल हो । रेशमलाल चौधरी बाहेक और ९ थान मुद्दाफे लगाउमे धारके सुनुवाइ करल रहे ।

२०७७ भदौ ७ गते कैलालीके टीकापुरमे अखण्ड सुदूरपश्चिम ओ थरुहट प्रदेशके माग कैना दुई समूहबीच हुइल झडप ओ आन्दोलनके क्रममे एसएसपी लक्ष्मण न्यौपानेसहित ७ जानेक ज्यान गैल रहे । उ घटनामे रेशमलाल चौधरी, लक्ष्मण थारु लगायतहे दोषी मानल रहे । कैलाली जिल्ला अदालत ओ उच्च अदालत दिपायलसे दोषी ठहर हुइल रेशमलाल चौधरी घटनामे अपन संलग्नता नइरहल कहटी सर्वोच्च अदालत पुगल रहिट ।

उच्च अदालतसेफे कैलाली जिल्ला अदालतके फैसला सदर करटी पूर्व सांसद समेत रहल चौधरीहे दोषी ठहर करल रहे । ओकरपाछे चौधरी २०७७ फागुन १२ गते उच्च अदालतके फैसलाविरुद्ध रिट लेके सर्वोच्च अदालत पुगल रहिट ।
कैलालीसे अघिल्का प्रतिनिधिसभा निर्वाचनमे निर्वाचितसमेत हुइल चौधरी निलम्बनके अवस्थामे रहेबेर उहाँक पदावधि सेकल रहे । उच्च अदालतके फैसला अनुसार हाल कारागार कार्यालय डिल्लीबजारमे जेल सजाय भुक्तान करटी रहल चौधरीके पहलमे नागरिक उन्मुक्ति पार्टीसमेत गठन करल बा । रेशम चौधरी गोसिनीय रञ्जित श्रेष्ठ चौधरी उ पार्टीके अध्यक्ष बटी ।