कैदीबन्दी रिहा नैहुइटसम विश्वासके मत नैडेना
पहुरा समाचारदाता
धनगढी, २४ माघ । प्रदेश सरकार गठनमे सहयोग करल सत्ता साझेदार दल नागरिक उन्मुक्ति पार्टीसे रेशम चौधरीसहितके कैदीबन्दी जेलसे रिहा हुइलेसे किल सुदूरपश्चिम प्रदेश सरकारहे विश्वासके मत डेना निर्णय करले बा ।
पार्टीके मंगरके बैठल बैठकसे टीकापुर घटनाके कैदीबन्दीहे रिहा करलवपाछे किल सुदूरपश्चिम प्रदेशके मुख्यमन्त्री राजेन्द्रसिंह रावलहे विश्वासके मत डेना निर्णय करल हो ।‘कैदीबन्दीके रिहाइपाछे किल मुख्यमन्त्रीहे हमार पार्टीके विश्वासके मत जाइ’, नागरिक उन्मुक्ति पार्टीके केन्द्रीय सदस्य एवम् प्रतिनिधि सभा सदस्य गंगा चौधरी कहलै ।
उहाँ एक हाठसे रिहाइ हुउइयाहे बुझ्ना ओ औरे हाठसे विश्वासके मत डेना निर्णय हुइल बटैलै ।‘यदि, रिहाइ नैहुइ कलेसे विश्वासके मत नैडेब’, चौधरी कहलै । सुदूरपश्चिम प्रदेशके मुख्यमन्त्री रावल बुधके दिनके १ बजे विश्वासके मत लेटी बाटै ।
सुदूरपश्चिम प्रदेश सरकारहे विश्वासके मत डेना वा नैडेना बारे निर्णय करक लाग नागरिक उन्मुक्ति पार्टीके सातु प्रदेश सभा सदस्य मंगरके सकारे काठमाडौं गैल रहिट । उ पार्टीसे जेलमे रहल आपन संरक्षक रेशम चौधरीसँग डिल्ली बजार कारागारमे छलफल करल रहे ।
टीकापुर घटनाके मुद्दा फिर्ता हुइ पर्नार्, रेशम चौधरी लगायतके कैदीबन्दी रिहा हुइ पर्ना ओ लाल आयोगके प्रतिवेदन सार्वजनिक करे पर्ना नागरिक उन्मुक्ति पार्टीसे पहिलेसे माग रख्टी आइल बा ।
संविधानके धारा १६८ के उपधारा (२) बमोजिम दुई वा दुईसे ढेर दलके समर्थनमे बहुमत पुगाके नियुक्त हुइल मुख्यमन्त्रीसे एक महिनाभिट्रे विश्वासके मत लेहे पर्ना प्रावधान रहल बा । मुख्यमन्त्री माघ २६ गतेभिट्रे प्रदेश सभासे विश्वासके मत लेसेके पर्ना रहल बा ।
नागरिक उन्मुक्ति पार्टीसे विश्वासके मत नैडेहलमे मन्त्रिमण्डल विस्तार नैहुइटी सरकार विघटन हुइना अवस्था सृजना हुइना बा । नेकपा (माओवादी केन्द्र), नेकपा (एमाले), नागरिक उन्मुक्ति पार्टी ओ राप्रपा मिलके प्रदेश सरकार गठन करल रहे । मुख्यमन्त्रीके लाग दाबी पेस कैना दिन रावलहे नागरिक उन्मुक्ति पार्टीसे अन्तिम अवस्थामे किल साथ डेहल रहे ।
सुदूरपश्चिम प्रदेश सभामे नागरिक उन्मुक्ति निर्णायक पार्टी हो । इ पार्टीके समर्थनबिना मुख्यमन्त्रीहे विश्वासके मत नैपुगी । उहाँहे २७ जनहनके समर्थन आवश्यक रहल बा । प्रदेश सभामे नेकपा (माओवादी केन्द्र)से ११, एमालेसे १०, नागरिक उन्मुक्ति पार्टीसे सात ओ राप्रपासे एक जाने प्रदेश सभा सदस्यके उपस्थिति रहल बा ।
