सुख्खा बन्दरगाह हाली सञ्चालन हुइः उद्योगमन्त्री भण्डारी
पहुरा समाचारदाता
धनगढी, २६ माघ । उद्योग वाणिज्य तथा आपूर्ति मन्त्री दामोदर भण्डारी मुलुकबाहर रहल ५० लाख युवाहे स्वदेशमे फर्कैना वातावरण सरकारसे बनैटी रहल बटैले बाटै ।
कैलाली उद्योग वाणिज्य संघसे आयोजना करल स्वागत तथा सम्मान कार्यक्रममे मन्त्री भण्डारी सरकारसे रोजगारी सृजना कैना ओ मुलुक बाहर रहल ५० लाख युवाहे नेपाल फर्र्कना योजना सरकारके रहल बटैलै ।
उहाँ व्यापार घाटा घटैना फेन सरकार लागल बटैले बाटै । ‘व्यापार घाटा बह्रटी रहल बा । ५० लाख दक्ष जनशक्ति विदेश बाटै । ओइनहे लन्ना बा’ मन्त्री भण्डारी कहलै, ‘सरकार ओम्ने लागल बा ।’
सुदूरपश्चिममे औद्योगिक विकास जैसिक हुइ पर्ना हो उ मेरके हुइ नैसेकल मन्त्री भण्डारी कहलै, यहाँके समस्या हल कैनामे प्रतिबद्ध बाटी ।
फागुन १ गते प्रधानमन्त्री पुष्पकमल दाहाल प्रचण्ड दोधरा चाँदनीके सुख्खा बन्दरगाहके अवलोकन कैना ओ निर्माणमे लग्ना निर्देशन डेना कार्यक्रम फेन रहल बा ।
भारतीय पक्षसे फेन सुख्खा बन्दरगाहा निर्माणमे चासो डेना उहाँ बटैलै । सुख्खा बन्दरगाह निर्माण पाछे आयात ओ निर्यातमे ढेर सहज हुइना उहाँके कहाइ रहे । ३ बरसमे सम्पन्न कैना मेरके काम हुइटी रहल मन्त्री भण्डारी दाबी करलै । सुख्खा बन्दरगाह निर्माणसे भारत भ्रमणमे फेन प्राथमिकता पैना उहाँ बटैलै ।
हाली भारतसँग व्यापार पारवहन सम्झौता कैना ओ विदेशी लगानी नेपालमे भित्र्याइना मेरके सरकारसे नीति बनैना समेत मन्त्री भण्डारीके दाबी रहल बा ।
उहाँ कहलै, ‘उद्योगीहुक्रनहे सुरक्षित रुपमे उद्योग सञ्चालनके नीति बनाजैना बा । सरकार यम्ने लागल बा ।’ खानी विभागहे खानीके सम्भाव्यता अध्ययन कैना फेन निर्देशन डेसेकल उहाँ बटैलै ।
‘मेड इन नेपालके अभियान सुरु करटी बाटी । औद्योगिक नीति संशोधन कैके आघे बह्राब ।’ उहाँ कहलै, ‘नयाँ आर्थिक बरसमे सुदूरपश्चिम प्रदेशमे औद्योगिक क्षेत्रके विकासमे कुछ नयाँ अनुभूति पैबी ।’
स्वागत तथा भेटघाट कार्यक्रम सुदूरपश्चिम प्रदेश सभा सदस्य धर्मराज पाठक उद्योगी रो व्यवसायीहुक्रनके समस्या समाधान कैना प्रदेश सरकार फेन लागल बटैलै ।
कैलाली उद्योग वाणिज्य संघके अध्यक्ष पुष्पराज कुँवर औद्योगिक विकासके लाग सहज हुइना नीति सरकारसे लन्ना अपेक्षा रहल बटाइल रहिट ।
