सुदुरपश्चिमके मुख्यमन्त्रीमे काँग्रेस दलके नेता शाह नियुक्त, सपथ ग्रहण काल्ह
पहुरा समाचारदाता
धनगढी, २६ माघ । नेपाली कांग्रेस संसदीय दलके नेता कमल शाह मुख्यमन्त्रीमे नियुक्त हुइल बटै ।
सुदूरपश्चिम प्रदेशके मुख्यमन्त्री राजेन्द्र रावल बहुमत गुमाइलसंगे काँग्रेस संसदीय दलके नेता शाह मुख्यमन्त्रीमे नियुक्त हुइल हुइट । बिफेक बैठल बैठकमे सत्ता साझेदार दल नागरिक उन्मुक्ति पार्टी अनुपस्थित हुइलपाछे रावल विश्वासके मत पाई नइसेकलै ।
मुख्यमन्त्री रावलसे विश्वासके मत नइपाइलपाछे संविधानके धारा १६८ के उपधारा ३ अनुसार भारी दलके हिसाबसे कांग्रेस संसदीय दलके नेता कमल शाह मुख्यमन्त्री बनल हुइट ।
५३ सदस्यीय प्रदेश सभामे कौनोफे दलके एकल बहुमत नइहो । सुदूरपश्चिममे सरकार गठनके लाग २७ सांसद आवश्यक परठ । प्रदेशसभामे नेपाली कांग्रेसके १९, नेकपा एकीकृत समाजवादी ४ ओ एक जाने स्वतन्त्र सांसद बटै । नागरिक उन्मुक्तिके ७ सासद रहल बटै । नेकपा माओवादी केन्द्र ११ (सभामुख), नेकपा एमाले १० (उपसभामुख), ओ राप्रपाके १ सांसद बटै ।
काँग्रेस नेतृत्व सरकार बन्लेसेफे विश्वासके मत पैना नागरिक उन्मुक्ती पार्टी ओ एकीकृत समाजवादीके समर्थन आवश्यक रही । नागरिक उन्मुक्ती साथ नइडेलेसे माओवादी केन्द्रके साथ शाहहे अनिवार्य रही । पद तथा गोपनीयताके सपथग्रहण कैना कार्यक्रम रहल प्रदेश प्रमुखके कार्यालय जनैले बा ।
