एलाइन्स ईन्टरनेशनलके १७ औं बार्षिकोत्सव
पहुरा समाचारदाता
धनगढी, २८ माघ । कैलालीके धनगढी उपमहानगरपालिका बैयाबेहेडीमे रहल एलाइन्स ईन्टरनेशनल मोडेल स्कुलके खेल सप्ताह तथा १७ औं बार्षिकोत्सव समापन हुइल बा ।
माघ २२ गतेसे सुरु हुइल विद्यालयके अतिरिक्त क्रियाकलापके साथे खेल सप्ताह तथा वार्षिकोत्सव समापन हुइल हो । विद्यालयसे टमान कक्षामे अध्यनरत विद्यार्थीहुकनहे फुटवल, क्रिकेट व्याटमिन्टन, हाजिर जवाफ दौड भलिबल लगायतके और प्रतियोगिता सञ्चालन करल रहे ।
कार्यक्रममे बोल्टी विद्यार्थीहुकनके चौतर्फी विकासके लाग पढाईके साथ साथे अतिरिक्त क्रियाकलापके फे आवश्यकता रहल ओरसे हम्रे हमार विद्यार्थीहुकनहे समय समयमे खेलकुदफे करैना करल विद्यालयके प्रधानाध्यापक मनोज पन्त बटैलै ।
उहाँ कहलै, विद्यालय कहल पढाई केल कैना थलो नइहो विद्यार्थीहुकनहे ढेर बाट सिखैना थलो हुइल ओरसे आब विद्यार्थीहुकनहे बाह्य ज्ञानकेफे आवश्यकता रहना ओरसे हम्रे पढाईसंगै विद्यार्थीके क्षेमता अभिबृद्धि करटी रहल बटी ।
उहे अवसरमे विद्यालयसे शिक्षक शिक्षिका तथा अभिभावकके मनोवल उच्च रख्न जरुरी कहटी विद्यालयके २ जाने कर्मचारीहेफे नगद सहित सम्मान करल बा । विद्यालयके शिक्षक कमल प्रसाद अधिकारी ओ शिक्षिका संगिता सोनाम आउजीहे नगद सहित सम्मान करल हो ।
विद्यालयसे अइना दिनमे शैक्षिक उत्कृष्ठ शैक्षिक गुणस्तर प्रदान करेक लाग अतिरिक्त अंग्रेजी पाठ्यक्र, नृत्य, योगा तथा मेडिरेसन कक्षा सञ्चालन कैना टमान क्लव गठन गठन कैना ओ ओम्ने विद्यार्थीहुकनके सक्रिय सहभागिता करैना विद्यालय व्यवस्थापन समितिके अध्यक्ष गिरीराज ओझा बटैलै । यकर साथे विद्यालयहे काठमाण्डौमे रहल उत्कृष्ठ विद्यालय संग सहकार्यमे चेन स्कुल बनैना ओझा बटैलै ।
