यूवा प्रतिभा प्रदर्शनीमे मनिष चौधरी पहिल
पहुरा समाचारदाता
हसुलिया, २८ माघ । कैलालीके कैलारी गाउँपालिका शिक्षा यूवा तथा खेलकुद शाखाके आयोजनामे यूवा प्रतिभा प्रदर्शनी कार्यक्रम हुइल बा ।
कैलारी गाउँपालिकाके अध्यक्ष राजसमझ चौधरीके अध्यक्षतामे हुइल यूवा नवप्रवर्तनात्मक विचार प्रदर्शनी तथा प्रस्तुतीकरण प्रतियोगिता मुल्याङकन कार्यक्रम २०७९ मे चार जानेक निवेदन परलमे तीन जाने सहभागी हुइल रहिट ।
प्रतियोगितामे सहभागी हुइल फोटो स्क्रायच आर्टटिष्ट मनिष चौधरी पहिल हुइल बटै । ओस्टेक दुसरा स्थान हासिल करल यूवाराज जोशी प्लाष्टिकके कारण हुइना हानिकारणबारे प्रस्तुती प्रदर्शनी करल रहिट । कलेसे टिसरा स्थान हासिल करल साहित्यकार सागर कुश्मी साहित्य प्रस्तुत करल रहिट ।
प्रदर्शनी तथा प्रस्तुतीकरण करल तिनु जानेक अलग अलग उद्देश्य रहे । पहिल हुइल मनिष चौधरी फोटो स्क्रयाच शिक्षकफे हुइट । उहाँक आर्टसे समाज नुकाल प्रतिभाहे बाहेर नन्नामे सहयोग कैना आश करल बा ।
युवराज के प्रदर्शनीसे प्लाष्टिकके कारण मानव स्वास्थ्यके लाग हानी पुगैटी रहल ओरसे ध्यान डेना सन्देश डेहल बा । कलेसे सागर कुश्मीके प्रतिभासे साहित्य मार्फत समाजहे सचेतना फैलैना योगदान पुगैटी रहल कना हो । प्रतियोगिताके पहिलहे १० हजार, दुसरहे ७ हजार ओ टिसराहे ४ हजार पुरस्कारके व्यवस्था करल रहे ।
उदघाटन कार्यक्रमके वडका पहुना रहल राष्ट्रिय यूवा परिषद प्रदेश सदस्य बतासु चौधरी ढेर यूवा बेरोजगार हुके कुलतमे फस्टी रहल ओरसे गाउँठाउमे नुकल प्रतिभाके खोजी अनिवार्य रहल बटैलै ।
कैलारी गाउँपालिका शिक्षा यूवा तथा खेलकुद शाखाके प्रमुख गणेश प्रसाद मिश्र गाउँपालिकासे यूवा प्रतिभा खोजीके लाग विज्ञापन निकारके खुल्ला प्रतिष्पर्धा कैना कहल मने जम्मा चार जाने केल निवेदन डेहल बटैलै । गाउँपालिकासे यिहीसे आघे यूवा संसदीय अभ्यास कार्यक्रमफे करल बटैलै ।
कार्यक्रमके संचालन कैलारी गाउँपालिका सामाजिक विकास शाखा यगम कलेल करले रहिट । यूवा प्रतिभा प्रदर्शनी कार्यक्रममे टमान विद्यालयके प्रअ, शिक्षकहुकनके सहभागिता रहल रहे ।
