टीकापुर घटनाके बन्दीनहे जेलमुक्त कैना पहल करम : मुख्यमन्त्री शाह
पहुरा समाचारदाता
धनगढी, २८ माघ । सुदूरपश्चिम प्रदेशके नवनियुक्त मुख्यमन्त्री कमलबहादुर शाह रेशम चौधरीहे रिहाइके लाग पहल कैना आश्वासन डेले बाटै ।
नागरिक उन्मुक्ति पार्टी (नाउपा) के संरक्षक समेत रहल चौधरीके रिहकाइके लाग मुख्यमन्त्री शाह आपन सेकटसम पहल कैना आश्वासन डेहल हुइट ।
मुख्यमन्त्री शाह शनिच्चरके सकारे चौधरीके डाइ ओ परिवारके अन्य सदस्यसँग घरमे पुगके भेट कैनाके साथे ओइसीन आश्वासन डेहल हुइट ।‘टीकापुर घटनाहे राजनीतिक रूपमे हेरे परल ओ उहे हिसाबसे समाधान हुइ परल, हालीसे हाली रेशमके रिहाइ ओ टीकापुर घटनाके बन्दीहुक्रनहे छुटैना अभियानमे मै आजसे लागसेक्नु’, उहाँ कहलै ।
ओहे बीच मुख्यमन्त्री शाह ओ नागरिक उन्मुक्ति पार्टीके अध्यक्ष रञ्जिता श्रेष्ठ चौधरी बिच भेटवार्ता हुइल बा । शनिच्चरके टीकापुरमे उहाँहुक्रन बीच भेटवार्ता हुइल मुख्यमन्त्री शाहके सचिवालय जनैले बा ।
भेटमे समसामयिक राजनीतिक विषयमे बातचित हुइल मुख्यमन्त्री शाह बटैलै । ‘उहाँहुक्रे एमाले नेतृत्वके सरकारहे विश्वासके मत नैडेहलपाछे मोर नेतृत्वमे सरकार गठन हुइल बा । मुख्यमन्त्री हुइलपाछे पहिलचो उहाँसे भेटघाट हुइल,’ शाह कहलै, ‘समान्य राजनीतिक विषयमे बातचित हुइल रहे ।’
अपने उहासे विश्वासके मत फेन मँग्ली कना जिज्ञाशामे शाह कहलै, ‘हो, उ विषयमे फेन समान्य बात हुइल ।’
सुदूरपश्चिममे एमालेके राजेन्द्र सिंह रावलहे मुख्यमन्त्रीमे समर्थन करल नाउपासे माग, मुद्दा सम्बोधन नैहइल कहटी विश्वासके मत नैडेहलपाछे बिफेक रोज उहाँक नेतृत्वके सरकार ढलल् रहे ।
बिफेक रोज नै प्रदेश प्रमुख देवराज जोशी बरवार दलके हैसियतमे शाहहे मुख्यमन्त्रीमे नियुक्त करल रहिट । शुकके पदभार ग्रहण करल शाह शनिच्चरके टीकापुर पुगके नाउपाके अध्यक्षहे भेट्कैलहे अर्थपूर्ण रुपमे हेरल बा ।
तीन सदस्यीय मन्त्रिमण्डल विस्तार करल शाहहे अब्बेक अवस्थामे कांग्रेसके १९, नेकपा(एकीकृत समाजवादी) के ४ ओ स्वतन्त्र सांसद डा.तारा जोशी समेत २४ जनहनके समर्थन डेखजाइठ् । मने उहाँ नाउपा ओ नेकपा माओवादी केन्द्रहे समेत विश्वासमे लेना रणनीतिमे सक्रिय रहल बाटै ।
शाह मुख्यमन्त्री हुइलपाछे ३० दिनभिट्रे विश्वासके मत लेहे पर्ना बा । जेकर लाग २७ सांसदके समर्थन चाहठ् । सुदूरपश्चिम प्रदेश सभामे नाउपा निर्णायक रहल बा ।
