ईलाइट कप फुटवल प्रतियोगिताके उपाधि युवा जनहितहे
पहुरा समाचारदाता
हसुलिया, २८ माघ । कैलालीके कैलारी गाउँपालिका वडा नम्बर ६ मे हुइल इलाइट कप फुटबल प्रतियोगिताके उपाधि युवा जनहित क्लब जिटले बा ।
इलाइट युथ क्लवके आयोजनामे कैलारी गाउँपालिका ६ के बनकट्टा खेल मैदानमे हुइल प्रतियोगिताके फाईनलमे सुपर मुन अफ लेक क्लबहे ३२ से हरैटी युवा जनहित च्याम्पीयन हुइल हो ।
युवा जनहितहे च्याम्पीयन बनाइक लाग रोशन विक, निराजन धामी ओ कुवेर सिंह एक एक गोल करलै ।
सुपर मुनके लाग शिशिर मगरसे दुई गोल करलेसेफे टीमहे च्याम्पीयन बनाई नइसेकलै । फाईनल खेलके म्यान अफ द म्याच युवा जनहितके कुवेर सिंह हुइलै । उहाँ नगद दुई हजार प्राप्त करलै ।
ईलाईट कप फुटवल प्रतियोगिताके बिजेता बनल युवा जनहितसे नगद ७५ ओ उपबिजेता हुइल सुमर मुनसे नगद ३५ हजार पुरस्कार पाइल ईलाईट युवा क्लवके अध्यक्ष देवेन्द्र हमाल बटैलै । ओस्टेक प्रतियोगिताके टमान विधामेफे युवा जनहितसे कब्जा जमाइल बा । प्रतियोगिताके उत्कृष्ट खेलाडी युुवा जनहितके सुशिल विक हुइलै । उहाँ नगद ५ हजार प्राप्त करलै । ओस्टेक उत्कृष्ट गोलरक्षक युवाजनहितके सन्दीप कडायत ओ सर्वाधिक गोलकर्ता युवा जनहितके कुवेर सिंह हुइलै । ओइने नगद दुई दुई हजार प्राप्त करलै ।
विजयी खेलाडीहुकनहे शनिच्चर एक समारोहके बीच पुरस्कार वितरण करल बा । गैल माघ २० गतेसे हुइल प्रतियोगितामे १६ ठो टीमके सहभागिता रहल रहे । पहिल संस्करणके आयोजनापाछे प्रतियोगिताहे निरन्तरता डेना क्लब जनैले बा । अइना संस्करणमे नगद पुरस्कार बृद्धिसंगे राष्टिय खेलाडीहुकनहेफे सहभागी बनैना क्लबके अध्यक्ष हमाल जानकारी डेलै ।
