लोटस आइ अत्तरिया ओ नवबालबाटिका बौनिया विजयी
पहुरा समाचारदाता
धनगढी, २८ माघ । कैलालीके धनगढीमे जारी विद्यालय स्तरीय यु–१९ राष्ट्रिय टी–२० क्रिकेट प्रतियोगिता लिटल फलावर प्रिमियर लिग एलपीएल अन्तर्गत आठौँ दिन सम्पन्न दुई खेलमे लोटस आई स्कुल अत्तरिया ओ नवबालबाटिका विद्या मन्दिर बौनिया विजयी हुइल बटै ।
दिनके पहिल खेलमे लोटस आई स्कुल अत्तरियासे भुवनेश्वरी विद्या मन्दिर महेन्द्रनगरहे ६ विकेटसे पराजित करल । भुवनेश्वरीसे डेहल ६४ रनके लक्ष्य लोटस आईसे १०.३ ओभरमे ४ विकेट क्षतिमे भेटाइल ।
लोटस आईके लाग योगेन्द्र भाटसे सर्वाधिक १८, आयुब चन्दसे १२ तथा प्रेम शाहसे १० रन बनैलै । भुवनेश्वरीके बलर कैलाश ऐर २ तथा विपिन धामीसे १ विकेट लेलै ।
यी आघे टस जिटके ब्याटिङ करल भुवनेश्वरीसे १२।५ ओभरमे ६३ रन बनाईबेर सक्कु विकेट गुमाइल । भुवनेश्वरीके लाग खगेन्द्र ठगुन्नासे २७ रन बनैना बाहेक और ब्याटरसे दोहोरो अंकमे रन बनाई नइसेक्लै ।
लोटस आईके बलर सन्तोष विजसे एक्केली ५ विकेट लेलै । प्लेयर अफ द म्याच समेत घोषित उहाँ ३.५ ओभरमे केल ८ रन खर्चलै । वीरेन्द्र नाथ ओ हिक्मत महरा २/२ विकेट लेलै ।
दिनके दुसर खेलमे नव बाल बाटिका स्कुलसे लिटल फलावर स्कुलहे ९ विकेटसे पराजित करल । लिटल फलावरसे डेहल ९० रनके लक्ष्य नव बाल बाटिकासे १४।४ ओभरमे १ विकेट गुमाके भेटाइल ।
नव बाल बाटिकाके ब्याटिङमे नरबहादुर सार्कीसे अविजित ४० तथा विराट सिंह भण्डारीसे अविजित ३२ रन बनैलै । दुसरा विकेटके लाग नर ओ विराटसे ८४ रनके साझेदारी करलै ।
यी आघे टस जिटके ब्याटिङ करल लिटल फलावरसे निर्धारित २० ओभरमे सक्कु विकेट गुमाके ८९ रन बनाइल । ओकर लाग नरेन भट्ट सर्वाधिक ३० रन तथा विपिन रावल १९ रन बनैना बाहेक और जे दोहोरो अंकमे रन बनाई नइसेक्लै ।
नव बाल बाटिकाके बलर वीरबहादुर घर्ती मगरसे सर्वाधिक ४ विकेट लेलै जौन क्रममे ४ ओभरमे १७ रन खर्चलै । नरबहादुर सार्की २ तथा प्रकाश जैसी ओ गजेन्द्र बोहरा १/१ विकेट लेलै ।
वीर बहादुर घर्ती खेलके प्लेयर अफ द म्याच घोषित हुइलै । प्रतियोगिताके विजेताहे २ लाख ५१ हजार १ सय ११ ओ उपविजेताहे १ लाख २५ हजार ५ सय २५ नगदसहित ट्रफी, मेडल ओ प्रमाणपत्र प्रदान कैना बा । प्रतियोगिताके सर्वोत्कृष्ट खेलाडीसे नगद २० हजार, उत्कृष्ट बलर ओ ब्याट्सम्यानसे १०/१० हजार नगदसहित ट्रफी, मेडल ओ प्रमाणपत्र प्राप्त करही । ओस्टेक उदयमान खेलाडीहे नगद ५ हजार प्रदान कैना आयोजक जनैले बा ।
