अभियान लघुवित्तसे पुनर्वासमे वित्तीय साक्षरता तालिम प्रदान

पहुरा समाचारदाता
कञ्चनपुर, २८ माघ । अभियान लघुवित्त वित्तीय संस्था लिमिटेडसे ग्रामीण भेगके महिलाहे वित्तीय साक्षरता तालिम प्रदान करले बा ।

लघुवित्तसे पुनर्वास नगरपालिका वडा नं ४ घ गाँउके संस्थामे आवद्ध महिला सदस्यहुकनहे दुर्गा माविमे वित्तीय साक्षरता सम्बन्धी तालिम प्रदान करल बा ।

आई.बि.आर.डी. शाखाके आयोजनामे ‘पेवा बचत हमार बचत’ कना नाराके साथ वित्तीय साक्षरता सम्बन्धी कार्यक्रम सम्पन्न करल रहे । तालिममे भुरीगाँउ अनुगमन कार्यालय प्रमुख मधु सुदन निरौला वित्तीय सस्थाके कार्य, महत्व, लघुवित्तके इतिहास, कार्य, सेवा, बिमाके महत्व, रेमिटान्स सेवाके परिचय, बचतके महत्व, काहे बचत करेपरठ, लघुवित्त सस्थासे उपलब्ध करैना धितो तथा बिनाधितो कर्जाके प्रक्रिया, कर्जा भुत्तानीके तरिका, कर्जा सदुपयोगिताके महत्व, कर्जा सुचना केन्द्रके कार्य, ऋणी कालो सुचिमे परेबेर हुई सेक्ना समस्या ओ ग्रामीण क्षेत्रमे आत्मनिर्भर हुइना कैसिक लघु उद्यम कैना, अपन लघु व्यवसाय व्यवसायिक विकास करके आम्दानी वृद्धि करैना ओ लघु बिमाके महत्व बारे प्रशिक्षण डेलै ।

३५ जाने महिलाहुकनके सहभागिता रहल तालिममे आई.बि.आर.डी. शाखा प्रमुख यशोदा सिंह थापा संस्थाके परिचय, शाखाके गतिविधि तथा सेवा प्रवाह बारे जानकारी डेहल रहिट ।

तालिमके सहभागी महिलासे साक्षरता कार्यक्रमसे अपनेहुकनहे वित्तीय ज्ञान बृद्धिमे कैना सहयोग मिलल ओरसे दिगो व्यवसायिक कार्यके लाग घ गाँउमे व्यवसाहिक छेगरीपालन तालिम संचालन कैना अनुरोध करले रहिट ।