ब्रहमाकुमारीसे शिव सन्देश मोटरसाइकल र्याली ओ ज्योतिर्लिङ रथ यात्रा कैना
पहुरा समाचारदाता
धनगढी, २८ माघ । ब्रहमाकुमारी ईश्वरीय विश्व विद्यालय एवं राजयोग प्रशिक्षण केन्द्र नेपाल सुदूरपश्चिम प्रदेशसे शिवरात्रीके अवसरमे पारके सप्ताहव्यापी शिव सन्देश मोटरसाइकल र्याली ओ ज्योतिर्लिङ रथ यात्रा कैना जनैले बा ।
शनिच्चरके रोज पत्रकार सम्मेलनके आयोजना करके उ अभियान सुरु कैना जानकारी डेहल बा । ब्रहमाकुमारी ईश्वरीय विश्व विद्यालय एवं राजयोग प्रशिक्षण केन्द्र धनगढीके प्रमुख संचालिका हिरा डिडी शिवरात्रीमे शिवके प्रसाद कहटी भाङ धातुरो मने मानव रुवास्थ्यके लाग हानिकारक रहल ओरसे उ चिज सेवा नइकैना मजा डेहक लाग अभियान सुरु कैना बटैली । शिवके बुटी नाउँमे भाङ धतुरो खवैना विकृति बा, उहीहे हटाइक लाग सडक नाटकसहिटके कार्यक्रम कैना उहाँ जनैली ।
ब्रहमाकुमारी ईश्वरीय विश्व विद्यालय एवं राजयोग प्रशिक्षण केन्द्र धनगढीके सचिव महेन्द्र खनाल फागुन एक गतेसे अभियान सुरु हुइना ओ ओकर उदघाटन प्रदेश प्रमुख देवराज जोशीसे कैना बटैलै ।
फागुन एक गते सोम्मारके रोज सकारे सकारे ८ बजेसे धनगढी सेन्टरमे शिव सन्देशसे यात्रा सुरु हुइना बा । यात्रा ट्राफिक चौराह मेनरोड हुइटी फुलवारी डिपो बजार हुइटी हसुलियासम पुग्ना बा ।
फागुन २ गते धनगढीसे अत्तरिया हुइटी चौमाला, राजीपुर, मसुरिया, सुखड, बौनिया, साँझके टिकापुरसम पुग्ना जनाइल बा । फागुन ३ गते टीकापुरसे टिकापुर बजार, दुगौली, लम्की हुइटी धनगढीसम, फागुन ४ गते धनगढीसे कञ्चनपुरके पुनर्वाससम, फागुन ५ गते धनगढी सेन्टरमे शिवध्वजारोहण कैना बा ।
ओस्टेक करके फागुन ६ गते महाशिवरात्री महोत्सव प्रवचन, विविध सांस्कृतिक कार्यक्रम, शिवध्वजारोहण ओ फागुन ७ गते धनगढी–३ डिलाशैनीमे शिवध्वजारोहणके कार्यक्रम रहल सचिव खनाल बटैलै । पत्रकार सम्मेलनमे कैलालीके सहायक प्रमुख जिल्ला अधिकारी यज्ञराज जोशी, नेपाल पत्रकार महासंघ कैलालीके अध्यक्ष हिमालय जोशी लगायत मन्तव्य व्यक्त करले रहिट ।
कार्यक्रममे व्यसनराजके नाटकफे डेखाइल रहे । कार्यक्रममे संचालन ब्रहमाकुमारी ईश्वरीय विश्व विद्यालय एवं राजयोग प्रशिक्षण केन्द्रके हेमराज भण्डारीके करले रहिट । कार्यक्रममे सुदूरपश्चिम प्रदेश सामाजिक विकास मन्त्रालयके पूर्व सचिव टेकबहादुर रैका लगागत पत्रकारहुकनके सहभागिता रहे ।
