रेशम चौधरीहे हाली रिहा कैना आवश्यक बाः माधव नेपाल
पहुरा समाचारदाता
धनगढी, २९ माघ । नेकपा (एकीकृत समाजवादी) के अध्यक्ष एवं पुर्व प्रधानमन्त्री माधवकुमार नेपाल नागरिक उन्मुक्ती पार्टीके संरक्षकसमेट रहल रेशम चौधरीहे हाली रिहा कैना आवश्यक रहल बटैले बटै ।
अँटवारके रोज धनगढी पुगल उहाँ समाजवादी प्रेस संगठनसे आयोजना करल पत्रकार सम्मेलनमे बोल्टी उ बाट बत्वाइल हुइट । रेशम चौधरीहे हाली रिहा कैना आवश्यक बा’, उहाँ कहलै ‘मै सांसदके प्लेटफर्मसेफे उ बाट उठैले बटु । राजनितिक मुद्दामे ठन्क्याके धारे नइपरल ।’
उहाँ कहलै, चाहे रेशम चौधरीके पार्टीसे जोरल होए । चाहे माओवादीके शान्ति प्रक्रियाके पूर्णता प्रदान कैना विषयसे जोरल होए । यैसिन राजनितिक प्रकृतिके विषय बस्तु हाली टुङगाइना मजा रहठ ।’ विपल्व समुहसे जोरल विषयवस्तु लगागत छोट समुहके मुद्दा मामिलासे हाली टुङयाइना उपयुक्त रहलफे उहाँ बटैलै । रेशम चौधरीहे हालीसे हाली रिहा कैना सन्दर्भमे मै हमार पार्टीके ओरसे संचारमाध्यम मार्फत सरकारसे माग कैना चाहटु , पूर्व प्रधानमन्त्री नेपाल कहलै ।
सुदूरपश्चिम प्रदेशके निवर्तमान मुख्यीमन्त्री राजेन्द्रसिंह रावल विश्वासके मत नइपाईबेर नेकपा एमाले सरकार एक महिनामे ढलल बा । कलेसे नेपाली काँग्रेस सुदूरपश्चिम संसदीय दलके नेता समेत रहल कमल शाह मुख्यमन्त्रीमे नियुक्त हुके पद तथा गोपनीयताके सपथ ग्रहण कैसेकल बटै । उहाँफे तीस दिनभित्तर विश्वासके मत लेहे पर्ना बा ।
सुदूरपश्चिम प्रदेशमे नागरिक उन्मुक्ती पार्टी निर्णयक शक्ति हो । विश्वासके मत पाइक लाग मुख्यमन्त्री शाह नाउपाहे मनैना कसरत सुरुवाट कैसेकल बटै । मने टिकापुर घटनाके आरोपितहुक्रे रिहा नइहुइटसम एक ठो पटियाफे नइहुल्ना नाउपाके निर्णय बा ।
उ सन्दर्भमे बोल्टी नेकपा (एकीकृत समाजवादी) के अध्यक्ष एवं पुर्व प्रधानमन्त्री नेपाल विश्वासके मत पाइक लाग सक्कु जनहनहे समेटके लैजैना आवश्यक रहल बटैलै । सुदूरपश्चिम प्रदेशमे मध्यावधि चुनाव कैना स्थिति हुइलेसे मुलुकके अर्थतन्त्रसे ठेगेफे नइसेक्ना उहाँ बटैलै । अब्बेक अवस्थामे कुहीहे हुई सेकी संख्या कम आइल बा । चुनाव हुइलेसे संख्या ठपी कना आश लागल हुई । भारी शक्ति परिचालन कैके ढेर सिट नानब कना लागल हुई कलेसे उ मजा सन्देश नइडेना उहाँ बटैलै । राष्ट्रपतिके लाग अवसर अइलसे अपन पार्टी उपयुक्त पात्र पठैना उहाँ बटै ।
