उच्च अदालतसे अरुण चौधरीके रिटमे सरकारी वकिल कार्यालय कैलालीहे लिखित जवाफ डेना अन्तरिम आदेश

पहुरा समाचारदाता
धनगढी, २९ माघ । प्रतिनिधि सभा सदस्य अरूण चौधरीके रिटमे सरकारी वकिल कार्यालय कैलालीहे लिखित जवाफ डेना उच्च अदालतसे अन्तरिम आदेश जारी करले बा ।

अँटवारके रोज न्यायधिश देशबहादुर सार्कीके इजलाससे जिल्ला वकिल कार्यालय कैलालीहे फागुन ३ गतेभिटर लिखित जवाफ पेश कैना आदेश जारी करल हो ।

‘यम्ने का कैसिक हुइल हो ? निवेदकके निवेदन माग बमोजिमके बन्दी प्रत्यक्षीकरणके आदेश काहे जारी हुई नइपर्ना हो ? निवेदकके माग अनुसार बन्दी प्रत्यक्षीकरणके आदेश जारी हुई नइपर्ना कौनो आधार कारण एवं प्रमाण हुइलेसे उ समेत खुलाई प्रमाण सहित फागुन ०३ गतेके दिन ११ः०० बजेसम उच्च सरकारी वकील कार्यालय, दिपायलमार्फत लिखित जवाफ पेश कैना कहिके आदेश करल हो ।

म्याद गुजारके बैठलेसे पाछे अपनेक उजुर बाजुर नइलग्ना आदेशमे बा । ओस्टेक कारागार कार्यालयमे थुनामे रहल चौधरीहे कैलाली जिल्ला अदालतमा रहल श्रव्यदृश्य संवाद कक्षमे उपस्थित करैना कहल बा ।