पत्रकार लक्की चौधरीहे ‘यदु स्मृति पत्रकारिता’ पुरस्कार
पहुरा समाचारदाता
धनगढी, १ फागुन । यी वर्षके ‘यदु स्मृति पत्रकारिता’ पुरस्कार गोरखापत्रमे कार्यरत कैलालीके लोकबहादुर चौधरी (लक्की) हे प्रदान कैना बा ।
पुरस्कार सिफारिस समितिसे चौधरीहे पुरस्कृत कैना निर्णय करल समितिके सदस्य सचिव रुद्र खड्का जानकारी डेलै । वि.सं २०५३ से कैलालीसे पत्रकारितामे संलग्न चौधरी कार्यक्षेत्रसे विस्थापित हुइलेसेफे निरन्तर पेसामे सक्रिय रहलमे उच्च कदर करके पुरस्कार डेना निर्णय करल समितिके सदस्य सचिव खड्का बटैलै । थारु भाषाके प्रथम दैनिक पत्रिका ‘हमार पहुरा’ के सम्पादक प्रकाशक रहिके कैलालीसे पत्रकारिता करल पत्रकार चौधरी २०५९ चैत २९ से तत्कालीन थारु भाषाके साप्ताहिक पत्रिका ‘पहुरा’ साप्ताहिकके सम्पादक हुकेफे काम करल रहिट ।
पत्रकारिता, समाजशास्त्र तथा राजनीतिशास्त्रमे स्नातकोत्तर करल चौधरी २०६६ से गोरखापत्र दैनिकमे कार्यरत रहल बटै । कैलाली स्थायी घर रहल चौधरी गोरखापत्र दैनिकके उपसम्पादक हुइट । पत्रकारिता माध्यमसे शान्ति स्थापना, मानवअधिकार परिपालना तथा दण्डहीनता अन्त्यमे उहाँक करल योगदानके कदर करटी उ पुरस्कार प्रदान करे लागल हो । पुरस्कार यिहे फागुन २१ गते यदु स्मृति दिवसके अवसरमे रु २० हजारसहित प्रदान कैजाई । यदु स्मृति प्रतिष्ठानसे हरेक वर्ष दिवसके अवसरमे मानवअधिकार, शान्ति स्थापना ओ दण्डहीनताके पक्षमे कलम चलैना एक पत्रकारहे पुरस्कृत करटी आइल बा ।
तत्कालीन नेकपा (एमाले) रुकुमके सचिव रहल युद गौतमहे रुकुम सदरमुकामसे चौरजहारी जैना क्रममे २०५६ फागुन २१ गते डगरमे हत्या करल रहे ।
