नव बालबाटिका बौनियाफे सेमिफाइनलमे
पहुरा समाचारदाता
धनगढी, १ फागुन । कैलालीके धनगढीमे जारी विद्यालय स्तरीय यु–१९ राष्ट्रिय टी–२० क्रिकेट प्रतियोगिता लिटल फलावर प्रिमियर लिग (एलपीएल) के अन्तिम चारमे पुग्न टिमके टुङगो लागल बा ।
सोम्मार कैलालीके बौनियामे रहल नव बालबाटिका विद्या मन्दिर अत्तरियाके गुराँस एकेडेमीहे पराजित करलसंगेृ एलपीएलके अन्तिम चारमे पुग्न ४ टोलीके टुङगो लागल हो । जारी संस्करणमे अपराजित रहल डिफेन्डिङ च्याम्पियन सत्यवती एकेडेमी, लोटस आई स्कुल अत्तरिया ओ लिटल फलावर बोर्डिङ हाई स्कुल धनगढी यी आघे अन्तिम चारमे पुगसेकल टोली हुइट ।
सोम्मार अन्तिम चारके लाग हुइल निर्णायक खेलमे नव बाल बालबाटिकासे गुराँस एकेडेमीहे ७३ रनसे पराजित करटी सेमीफाइनलके यात्रा पक्का करल हो ।
धनगढी स्थित फाप्ला क्रिकेट मैदाने टस जिटके ब्याटिङ सुरु करल बालबाटिकासे २० ओभर खेल्टी ७ विकेट गुमाके १ सय ४१ रन बनाइल । १ सय ४२ रनके विजयी लक्ष्य पछ्यइल गुराँससे १४.१ ओभरमे अपन सक्कु विकेट गुमाके ६८ रन केल बनाई सेकल । ओकर सचिन साउद २० रन बनैना बाहेक और ब्याटरसे दोहोरो अंकमे रन बनाई नइसेक्लै । नव बाल बाटिकाके बलर नरबहादुर सार्की ह्याट्रिक सहित ४ विकेट लेलै । उहाँ इनिङ्सके तेह्रौँ ओभरके पहिल, दुसरा ओ टिसरा बलमे लगातार विकेट लेटी ह्याट्रिक पुरा करल रहिट । गजेन्द्र बोहरा ३ तथा प्रकाश जैसी २ विकेट लेलै ।
उ आघे बालबाटिकाहे प्रवेश साउद ओ विराट सिंह भण्डारी समान २९ रनके योगदान डेलै । प्रकाश जैसीसे २५ तथा गजेन्द्र बोहरासे २० रन बनैलै । गुराँसके बलिङमे सचिन साउद ३ तथा प्रकाश रोकायासे २ विकेट लेलै ।
सोम्मारके दुसरा खेलमे वेष्टन क्रिष्टलसे होली फेमिलीउप्पर सान्त्वना जित निकारल बा ।
टस जिटके ब्याटिङ करल होली फेमिलीसे निर्धारित २० ओभरमे ९ विकेट गुमाके १ सय ३२ रन बनाइल रहे । १ सय ३३ रनके विजयी लक्ष्य पछ्याइल वेष्टन क्रिष्टलसे १९.२ ओभरमे ५ विकेट गुमाके लक्ष्य भेटाइल । ओकर हृतिक थापासे ४२ ओ आशिष् तिरुवासे ३६ तथा नीरज ऐर अविजित २४ रन बनैलै । बलिङओर होली फेमिलीके राहुल भण्डारी २ विकेट लेलै ।
उ आघे होली फेमिलीके इनिङमे कैलाश क्षेत्रीसे ३९ ओ अभिषेक बुढासे २८ तथा मनोज खड्कासे २७ रन बनैलै । बलिङओर वेष्टनके रोशन थापा ओ सुधांशु रावल समान २/२ विकेट लेलै । दुनु टोली प्रतियोगितासे भर बाहेर हुसेकल बटै ।
आब प्रतियोगितामे मंगरके लिग चरणके अन्तिम खेल शारदा विद्या निकेतन ओ सैनिक आवासीय महाविद्यालय तेघरीबिच हुई । दुनु टोली प्रतियोगिताके उपाधि होडसे भर बाहेर हुसेकल बटै । बिफेक रोज दुई सेमीफाइनल ओ शनिच्चर उपाधी भिडन्त हुई ।
लिटल फलावर स्पोर्ट्स एण्ड इभेन्ट्सके आयोजनामे फागुन ६ गतेसम सञ्चालन हुइना प्रतियोगिताके विजेताहे २ लाख ५१ हजार १ सय ११ ओ उपविजेताहे १ लाख २५ हजार ५ सय २५ नगदसहित ट्रफी, मेडल ओ प्रमाणपत्र प्रदान कैजाई । प्रतियोगिताके सर्वोत्कृष्ट खेलाडी नगद २० हजार, उत्कृष्ट बलर ओ ब्याट्सम्यानसे १०/१० हजार नगदसहित ट्रफी, मेडल ओ प्रमाणपत्र प्राप्त करही । ओस्टेक उदयमान खेलाडीहे नगद ५ हजार प्रदान कैना आयोजक जनैले बा ।
