कैलारीमे किसान सुचिकृत प्रक्रिया आघे बह्रैना
पहुरा समाचारदात
हसुलिया, १ फागुन । कैलालीके कैलारी गाउँपालिकामे किसान सुचिकृत प्रक्रिया आघे बह्रैना निर्णय हुइल बा ।
अँटवारके रोज गाउँपालिका अध्यक्ष राजसमझ चौधरीके अध्यक्षतामे हुइल बैठकमे उ निर्णय हुइल गाउँपालिका प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम बटैलै । विविध विषयमे छलफलके लाग हुइल बैठकमे ऐलानीप्रति जग्गाके नाँपजोख प्रक्रिया आघे बह्राइक लाग पालिकास्तरीय सहजीकरण समितिसे छलफल तथा पुनःगठन हुइल उहाँ जनैलै । भूमि आयोग अन्र्तगतके जग्गा नापजोख प्रक्रिया वडा स्तरीय सहजीकरण समिति गठन करेकलाग सक्कु वडामे छलफल कैना बाट हुइल प्रवक्ता बम बटैलै । नाँपजोख वडा नम्बर ६ ओ ७ से सुरु हुइना उहाँ जनैलै । जाँपजोख पाछे जग्गाधनी लालपुर्जा डेना प्रवक्ता दिपेन्द्र बम बटैलै ।
ओस्टेक पकेट विकास कार्यक्रमबारे अन्तरक्रिया छलफल हुइल रहे । गाउँपालिकासे थारु आलु, केरा, तोरी, माछा पालन गैयाभैसिनीय पालन, कुखुरा पालनलगायत पकेट क्षेत्रमे अनुदान सहयोग करटी आइल बा । गाउँपालिकासे यिहे सालसे चैते धान ओ बसन्ते मकै लगुइयाहुकनहे अनुदानके व्यवस्था रहल गाउँपालिका अध्यक्ष राजसमझ चौधरी बटैलै ।
कार्यक्रममे गाउँपालिका उपाध्यक्ष भगवतीकुमारी चौधरी, वडा अध्यक्षहुक्रे, प्रमुख प्रशासकीय अधिकृत विरबहादुर ऐर, टमान शाखाके प्रमुख, कर्मचारीहुकनके उपस्थिति रहल रहे । कार्यक्रममे संचालन सामाजिक विकास शाखा प्रमुख यगम कलेल करले रहिट ।
