कैलारीमे फागुन ११ गतेसे हात्तीपाइले रोग विरुद्धके औषधी खवैना
पहुरा समाचारदाता
हसुलिया, २ फागुन । कैलालीके कैलारी गाउँपालिकामे यिहे फागुन ११ गतेसे २५ गतेसम हात्तीपाइले रोग विरुद्धके औषधी खवैना जनागिल बा ।
बुधके रोज कैलारी गाउँपालिका स्वास्थ्य शाखाके आयोजनामे हुइल राष्ट्रिय हात्तीपाइले रोग निवारण कार्यक्रम आम औषधी सेवन अभियान पालिका स्तरीय योजना तर्जुमा तथा बहु निकाय गोष्ठीमे उ जानकारी डेहल हो ।
कैलारी गाउँपालिकाके उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ हात्तीपाइले रोगसे बाचेक लाग एक्केठो उपाय औषधी खैना जरुरी रहल बटैली । हात्तीपाइले रोग लग्लसे मनैनके क्रुप बनाडेना ओरसे सक्कु जनहन औषधी खाडेना उहाँ आग्रह करली ।
हात्तीपाइले रोगबारे जानकारी ओ प्रस्तुतीकरण स्वास्थ्य शाखाके विरेन्द्र सापकोटा करल रहिट ।
कैलाली जिल्लामे ११औं हात्तीपाइले रोगके औषधी खवाजैटी रहल उहाँ बटैलै । हात्तीपाइले राष्ट्रिय हात्तीपाइले रोग निवारण कार्यक्रम करे जैटी रहल उहाँ बटैलै ।
फागुन ११ तोकल ठाउँमे ओ १२ गतेसे छुटल मनैनहे घरघर जाके औषधी खवैना कार्यक्रम रहल उहाँ बटैलै । कार्यक्रममे प्रमुख प्रशासकीय अधिकृत विरबहादुर ऐर, सामाजिक विकास शाखा प्रमुख यगम कलेल हात्तीपाइले रोगसे बच्ना औषधी खइही पर्ना बटैलै । कार्यक्रममे टमान शाखाके प्रमुख, सक्कु वडाके स्वास्थ्य संस्थाके प्रमुख तथा प्रतिनिधि, कर्मचारी, वडा अध्यक्ष, वडा सदस्यहुकनके सहभागिता रहे ।
