जोशीपुर स्वास्थ्य केन्द्रहे सिकलसेल चेकजाँच मेसिन
पहुरा समाचारदाता
जोशीपुर, ५ फागुन । कैलालीके जोशीपुर प्राथमिक स्वास्थ्य केन्द्रहे सिकलसेल एनिमिया रोग चेकजाँच कैना मेसिन हस्तान्तरण करल बा ।
सामाजिक विकास मन्त्रालय प्रदेश आपुर्ति केन्द्र महाशाखाके प्रमुख डा. निरज अर्याल ओ सेती प्रादेशिक अस्पतालके डा. प्रदिप मिश्र उक्त मेसिन गाउँपालिकाके अध्यक्ष चित्रबहादुर चौधरी ओ उपाध्यक्ष रेखा देवी कठरियाहे हस्तान्तरण करल रहिट ।
स्थानीय स्तरमे सिकलसेल रोगके चेकजाँच निःशुल्क हुइना खुशीके बातर रहल डा. प्रदिप मिश्र बटैलै । “थारू जातीके बाहुल्यता रहल इ गाउँपालिकामे सिकलसेल फेन विशेष कैके थारू समुदायके मनैनमे लग्ना रोग रहल ओरसे इ ठाउँके लाग इ मेसिनके आवश्यकता रहल रहे’, उहाँ कहलै–‘आब विशेष कैके सिकलसेल उपचार तथा परामर्श केन्द्र कहिके अलग्गे कार्यसेवा विस्तार करे सेक्लेसे ढेर प्रभावकारी रहना बा । इ रोग बंशाणुगत सर्ना हुइल ओरसे रोगके विषयमे स्वास्थ्यकर्मीहुक्रे सेकटसम विद्यालयमे जाके सन्देश मूलक कार्यक्रम चलैना आवश्यक रहल बा ।’
डा. मिश्र आपन जन्मस्थल क्षेत्र रहल ओरसे फेन इ ठाउँके विकासमे टेवा पुगैना आपन कर्तव्य रहल बटैलै ।
डा. निरज अर्याल मेसिन चलैना जनशक्तिके आवश्यकता ओ ल्यावके तापक्रम मेन्टेनमे चुनौती रहल बटैलै । उहाँ प्रदेश सरकारसे स्वास्थ्य सामग्री, औषधी आवश्यक परलमे सहयोग कैना बटैलै ।
गाउँपालिका अध्यक्ष चौधरी जोशीपुरका स्वास्थ्य क्षेत्रमे थप सेवा विस्तारमे प्रदेश आपुर्ती केन्द्रसे करल सहयोग प्रति कृतज्ञता व्यक्त करलै । साथे उहाँ प्राथमिक स्वास्थ्य केन्द्रहे मेसिन सञ्चालनके लाग आवश्यक सहयोग कैना फेन बटैलै ।
