सांसद चौधरीसहित १४ जानेक सजाय माफी
पहुरा समाचारदाता
धनगढी,६ फागुन । आगजनी मुद्दामे दोषी ठहर हुके कारागारमे रहल नागरिक उन्मुक्ति पार्टीके सांसद अरुणकुमार चौधरीहे सरकारके सिफारिसमे राष्ट्रपति विद्यादेवी भण्डारीसे सजाय माफी डेले बटी । शुकके माफीसम्बन्धी निर्णय हुइल राष्ट्रपति कार्यालयसे जनैले बा ।
चौधरीसहित १४ जनहनहे माफीके निर्णय हुइल हो । कानुनी प्रक्रिया पूरा करके संविधान ओ कानुनमे रहल प्रावधानअनुसार माफी डेहल गृह मन्त्रालय जनैले बा । प्रजातन्त्र दिवसके अवसरमे यैसिन माफी डेहल हो ।
माफीसम्बन्धी विषयमा सिफारिस हुइलेसेफे निर्णयके आधिकारिक जानकारी नइआइल गृह मन्त्रालयके प्रवक्ता जितेन्द्र बस्नेत बटैलै । ‘हम्रे १४ जानेक नाउँ माफीके लाग सिफारिस करल रही, राष्ट्रपति कार्यालयसे यीबारे आधिकारिक जानकारी नइआइल हो,’ उहाँ कहलै । राष्ट्रपति कार्यालयके सहायक प्रवक्ता लीलाकान्त पौडेलसे जारी करल विज्ञप्तिमे पुष्कर गौतमलगायत १४ जनहनहे माफी डेहल उल्लेख बा । बिफेक बैठल मन्त्रिपरिषद्के बैठकसे माफीसम्बन्धी सिफारिस करल रहे ।
संविधानके धारा २७६ मे टेक्के माफी डेहल हो । उ धारामे कहल बा, ‘राष्ट्रपतिसे कौनो अदालत, न्यायिक वा अर्धन्यायिक निकाय वा प्रशासकीय पदाधिकारी वा निकायसे करल सजायहे कानुनबमोजिम माफी, मुल्तबी, परिवर्तन वा कम करे सेक्जाई ।’ खास करके राजनीतिक प्रकृतिके मुद्दामे माफी डेना मर्मके आधारमे यैसिन प्रावधान धारल हो माफी पाइलहुक्रे प्रजातन्त्र दिवसके दिनमे छुटही ।
सांसद चौधरी गैल १९ माघमे पक्राउ परल रहिट । आगजनी मुद्दामे ६ महिना कैद हुइल रहे । ओस्टेक, तीन सय ८१ जाने कैदीहे असल चालचलनके हुइल आधारमे भुक्तान हुइना बाँकी कैद माफी हुइल बा । ५० प्रतिशत कैद भुक्तान करल, नकारात्मक मुद्दाके सूचीमे नइरहलहुक्रे यैसिन सुविधा पैटी आइल बटै ।
