न्यू होराइजनउप्पर डिसिएको जित

पहुरा समाचारदाता
धनगढी, ६ फागुन । भैरहवामे जारी खड्गप्रसाद गौचन यू–१९ क्रिकेट प्रतियोगितामे धनगढी क्रिकेट एकेडेमी(डिसिए)से जित हात परले बा ।

शनिच्चरके हुइल खेलमे डिसिएसे बुटबलके न्यू होराइजन एकेडेमीहे ५ विकेटसे पराजित करल हो । टस जिटके पहिल ब्याटिङ करल न्यू होराइजनसे १९.१ ओभरमे सक्कु विकेट गुमाके ४८ रनकेल बनाई सेकल रहे ।

ओकर लाग अमर मिश्र १३ ओ विशाल भुसाल ११ बाहेक और दोहोरो रन जोरे नइसेक्लै । डिसिएके सुर्या श्रेष्ठ ओ दिनेशराज जोशी समान ३–३ विकेट लेलै । सुर्यासे ५ ओभरमे २ ओभर मेडन रख्टी १० रनकेल खर्चल रहे । जवाफमे डिसिएसे १२. ३ ओभरमे ५ विकेट गुमाके लक्ष्य भेटाइल । ओकर आशिष लुहार १५ रन जोरलै ।

न्यू होराइजनके सुमित पराजुली २ विकेट लेलै । खेलके म्यान अफ द म्याच डिसिएके सुर्या श्रेष्ठ घोषित हुइलै । पूर्व राष्ट्रिय क्रिकेटर शक्ति गौचन उहाँहे पुरस्कृत करल रहिट ।