लोटस आई एलपीएलके च्याम्पियन

पहुरा समाचारदाता
धनगढी, ६ फागुन । कैलालीके धनगढीमे सम्पन्न सातौँ संस्करणके विद्यालय स्तरीय अन्डर–१९ राष्ट्रिय क्रिकेट प्रतियोगिता लिटल फलावर प्रिमियर लिग (एलपीएल) के उपाधि अत्तरियाके लोटस आई इङ्लिस स्कुल जिटले बा ।

फाप्ला क्रिकेट मैदान धनगढीमे सम्पन्न फाइनल खेलमे लोटससे डिफेन्डिङ च्याम्पियन समेत रहल अत्तरियाकेृ सत्यवती एकेडेमीहे ७ विकेटसे पराजित करल । सत्यवती एकेडेमीसे डेहल ९२ रनके लक्ष्य लोटस आईसे ३ विकेट गुमाके ११.३ ओभरमे भेटाइल ।

लोटस आईके ब्याटिङमे लक्की कडायतसे सर्वाधिक ४१ रन बनैलै जौन क्रममे अविजित रहटी ३२ बलमे ७ चौका प्रहार करलै । आयुब चन्दसे २८ तथा वीरेन्द्र नाथसे १४ रन बनैलै । सत्यवतीके बलर गौतम केसी ओ प्रतिक श्रेष्ठसे १÷१ विकेट लेलै ।
यी आघे टस जिटके ब्याटिङ करल सत्यवती एकेडेमीसे १९.१ ओभरमे सक्कु विकेट गुमाके ९१ रन बनाइल । सत्यवतीके लाग ओपनर इमरान शेखसे सर्वाधिक २७, कप्तान सुजन गौतमसे १७ तथा सोनु अन्सारीसे ११ रन बनैना बाहेक और ब्याटरसे दोहोरो अंकमे रन बनाई नइसेक्लै । इमरान ओ सोनुसे ३५ रनके ओपनिंग साझेदारी करलेसेफे ओकरपाछे सत्यवतीके ब्याटर नम्मा समय क्रिजमे जमे नइसेकल ।

लोटस आईके बलिङमे नरेन साउद ओ प्रेम शाहसे ४÷४ विकेट लेलै । प्लेयर अफ द म्याच घोषित साउदसे ४ ओभरमे केल ६ रन तथा शाहसे ४ ओभरमे ८ रन खर्चलै । हिक्मत महरा ओ सुवास रावलसे १÷१ विकेट लेलै ।

उपाधि जिटलपाछे प्रतिक्रिया डेना क्रममे लोटस आईके कप्तान विरेन्द्र नाथसे टिमके सकारात्मकता ओ तालमेल प्रमुख कारण रहल बटैलै । हमार टिम सदा सकारात्मक हुके खेलल ओ टिमके तालमेल बहुट मजा रहे । फाइनलमे हम्रे विपक्षीहे एक सयसे कममे समेट्न लक्ष्य लेहल रही जौन बलर पुरा करके डेखैलै उ दुसरा इनिंग्समे लक्ष्य पछ्यइना सहज हुइल उहाँ कहलै ।
उपविजेता बनलपाछे सत्यवती एकेडेमीके कप्तान सुजन गौतम फाइनलमे ब्याटिंग धरासायी हुइनाहे दोष डेलै । दुर्भाग्यवस ब्याटिंग धरासायी बनल ओ ब्याटरसे जिम्मेवारी डेखाई नइसेक्लै । आक्रामक सट खेले खोजेबेर लगातार विकेट गुमे पुगल । कम योगफलहे रक्षा कैना बलरहुकनहे सहज नइरहल ।

उपाधि सहित लोटस आई स्कुलले २ लाख ५१ हजार १ सय ११ रुपैयाँ तथा विजेता ट्रफी प्राप्त ग¥यो । उपविजेताले १ लाख २५ हजार ५ सय २५ रुपैयाँ प्राप्त करलै ।
प्रतियोगिताके प्लेयर अफ द सिरिज लोटस आई स्कुलके आयुब चन्द चुन्लै । उहाँ ५ खेलमे २ प्लेयर अफ द म्याच सहित १७९ रन ओ ५ विकेट लेले रहिट । आयुबसे २० हजार नगद पुरस्कार सहित ट्रफी प्राप्त करलै । वेस्ट ब्याट्सम्यान लोटसके योगेस भाट क्षेत्री ओ वेस्ट बलरफे लोटसके सन्तोष विज चुन्लै । ओइने जनही १०÷१० हजार प्राप्त करलै । उदयमान खेलाडी लिटल फलावरके सुबोध तिवारी चुनेबेर उहाँ ५ हजार नगद पुरस्कार प्राप्त करलै । विजेता खेलाडीहुकनहे पूर्व मन्त्री तथा प्रतिनिधि सभा सदस्य वीरबहादुर बलायर एक समारोहके बिच पुरस्कार वितरण करलै ।