भैरहवामे डिसिएके लगातार दुसरा जित

पहुरा समाचारदाता
धनगढी, ७ फागुन । भैरहवामे जारी खड्गप्रसाद गौचन मेमोरियल यू–१९ क्रिकेट प्रतियोगितामे धनगढी क्रिकेट एकेडेमी(डिसिए)से लगातार दुसरा जित हात परले बा ।

अँटवारके हुइल खेलमे डिसिएसे काठमाडौंके एक्सिलेन्स क्रिकेट एकेडेमी(सिईसी)हे ८ रनसे पराजित करल हो ।
डिसिएसे डेहल ८९ रनके लक्ष्य पछ्याइल सिईसी २०.५ ओभरमे सक्कु विकेट गुमाके ८१ रनमे समेटल ।
सिईसीके लाग ओमकर यादवसे ३४ तथा सिद्धान्त साउद ओ स्मिथ बुढासे समान १४–१४ रन बनैलै । डिसिएके निरज ऐर, दिनेशराज जोशी ओ निशान्त रेग्मीसे समान २–२ विकेट लेलै ।

उ आघे टस जितके पहिल ब्याटिङ करल डिसिएसे २०.१ ओभरमे सक्कु विकेट गुमाके ८८ रन बनाइल रहे । डिसिएके आशिष लुहारसे १७ ओ निरज ऐरसे १४ रन जोरलै । सिईसीके किरण घर्तीमगर ४ तथा ओमकार यादव ओ सिवाकर श्रेष्ठ समान २–२ विकेट लेलै । डिसिएसे यी आघे शनिच्चर हुइल खेलमे बुटवलके न्यू होइजन एकेडेमीहे पराजित करल रहे ।