सुदूरपश्चिम सरकार पाँच बरससम चली : मुख्यमन्त्री शाह

पहुरा समाचारदाता
धनगढी, ८ फागुन । सुदूरपश्चिमके मुख्यमन्त्री कमलबहादुर शाह प्रदेश सरकार पाँच बरससम चल्ना बटैले बाटै ।

सोम्मारके मुख्यमन्त्री तथा मन्त्रिपरिषद्के कार्यालयमे पत्रकारहुक्रनसँग भेटघाट कैटी मुख्यमन्त्री शाह उ बारे बट्वाइल हुइट । उहाँ प्रदेश सभामे प्रतिनिधित्व करुइया कौनो फेन राजनीतिक दलसे मध्यावधि निर्वाचन नैचाहल बटैलै ।

प्रदेश सभामे कौनो फेन दलके प्रष्ट बहुमत नैरहल अवस्थामे सुदूरपश्चिममे मध्यावधि निर्वाचन हुइना आशंका व्यक्त हुइल बटैटी मुख्यमन्त्री शाह प्रदेश सरकार पूर्ण कार्यकाल चल्ना दाबी करल हुइट । उहाँ विश्वासके मतके लाग सक्कु दलसँग सकारात्मक छलफल फेन हुइल बटैलै ।

‘विश्वासके मतके लाग सक्कु दलसँग सकारात्मक छलफल हुइटी रहल बा । कुछ दिनमे हम्रे विश्वासके मत लेब’ उहाँ कहलै, ‘सुदूरपश्चिम सरकार ५ बरससम निरन्तर चली ।’

उहाँ सुदूरपश्चिम प्रदेशमे मध्यावधि निर्वाचनमे फेन नैजैना बटैलै । प्रदेश मध्यावधि निर्वाचनमे जैना कौनो दल अथवा जनता नैचाहल ओरसे प्रदेशमे फेनसे चुनावमे गैलेसे जनताहुक्रे रखेड्ना बटैलै । उहाँ निर्वाचन सम्पन हुइल ढेर समय नैहुइल कारण फेन कोइ फेन चुनाव नैचाहल बटैलै ।

२७ पुसमे मुख्यमन्त्री नियुक्त एमाले संसदीय दलके नेता राजेन्द्रसिंह रावल विश्वासके मत नैपाइलपाछे पदमुक्त हुइल रहिट । उहाँहे समर्थन करल नागरिक उन्मुक्ति पार्टी विश्वासके मत नैडेहलपाछे रावल पदमुक्त हुइल रहिट । ओकरपाछे संविधानके धारा १६८ के उपधारा ३ बमोजिम सबसे बरवार दल नेपाली कांग्रेसके संसदीय दलके नेताके हैसियतमे शाह २६ माघमे सुदूरपश्चिमके टिसरा मुख्यमन्त्रीमे नियुक्त हुइल रहिट । संविधानअनुसार शाह ३० दिनभिट्रे विश्वासके मत लेहे पर्ना बा ।