बैंकके ब्याजदर विरुद्ध आन्दोलन
पहुरा समाचारदाता
धनगढी, ९ फागुन । कैलालीका व्यवसायीहुक्रे बैंक तथा वित्तीय संस्थाके ब्याजदर घटाइ पर्ना माग कैटी आन्दोलनमे उत्रल बाटै ।
कैलाली उद्योग वाणिज्य संघके अगुवाइमे व्यवसायीहुक्रे ब्याजदर विरुद्ध आन्दोलनमे उत्रल हुइट । बैंक तथा वित्तीय संस्थासे ब्याजदर मनोमानी बह्राइबर व्यवसाय धरासायी बन्टी गैल उहाँहुक्रे बटैले बाटै । माग सुनुवाइ नैहुइटसम आन्दोलनके थप कार्यक्रम घोषणा कैना संघसे जनैले बा ।
संघसे सोम्मारके पत्रकार सम्मेलन कैके चर्को ब्याजदर विरुद्ध प्रदर्शनलगायतके कार्यक्रम कैना घोषणा कैले बा । उहे बिच मंगरके रोज व्यवसायीहुक्रे धनगढी चौराहासे विरोध ¥याली निकरटी प्रर्दशन करल रहिट ।
संघके बरिष्ठ उपाध्यक्ष पुष्कर ओझा चर्को ब्याजदर असुल्टी रहल विरोधमे धनगढीमे प्रदर्शन करल बटैलै । बैंक तथा वित्तीय संस्थासे ब्याजदर मनोमानी बह्राइबर व्यवसाय धरासायी बनल कहटी उहाँ माग सुनुवाइ नैहुइलेसे आन्दोलनके थप कार्यक्रम घोषणा कैना बटैलै ।
चर्को ब्याजदर घटाइ पर्र्ना मागसहित अर्थमन्त्रीलगायत सरोकारवाला सक्कु निकायमे ज्ञापनपत्र बुझाके ध्यानाकर्षण करैलेसे फेन सुनुवाइ नैहुइल व्यवसायीहुक्रनके गुनासो रहल बा ।
व्यवसायीहुक्रे बैंक तथा वित्तीय संस्था, नेपाल राष्ट्र बैंक तथा अर्थमन्त्रालयके नीतिमे सुधारके माग, बैँक तथा बित्तीय सँस्थाके उच्च ब्याजदर नियन्त्रणके माग कैटी रहल बाटै । ओस्टके एक अंकके व्याजदर कायम हुइना पर्र्ना, बैंकके खर्च न्यून कैके स्पेड दर ३ प्रतिशत हुइ पर्र्ना, सेवा शुल्क, कर्जा स्वीकृत शुल्क, एलसी गैल बरसके आधारमे लेहे पर्र्ना, व्याज बुझैना म्याद ३५ दिनसम नियमित माने पर्र्ना, लिलाम प्रक्रिया स्थगित करे पर्र्ना, कोभिडके कारण थला परल अर्थतन्त्र उकस्ना कार्यक्रम लाने पर्ना लगायतके माग रहल बा ।
उ आन्दोलनमे होटल व्यवसायी संघ, मदिरा व्यवसायी संघ, इलेक्ट्रोनिक्स डिलर्स एसोसियसन, नेपाल सुनचाँदी व्यवसायी महासंघ, नाट्टा सुदूरपश्चिम, हार्डवेयर व्यवसायी संघ, होलसेल व्यवसायी संघ, निर्माण व्यवसायी संघ, ब्यूटीपार्लर व्यवसायी संघ, तरकारी तथा फलफुल व्यवसायी संघ ओ सुदूरपश्चिम अटोमोबाइल्स डिलर्स एसोसेसन एक्यवद्धता जनैले बाटै ।
