प्राध्यापक बुधराम चौधरीहे तिलोत्तमा राष्ट्रिय शैक्षिक साधना पुरस्कार
पहुरा समाचारदाता
धनगढी, ९ फागुन । सुदूरपश्चिमके ऐतिहासिक साहित्यिक केन्द्र कैलाली जनपुस्तकालयसे प्रदान कैना तिलोत्तमा राष्ट्रिय शैक्षिक साथना पुरस्कार २०७९ सह प्राध्यापक बुथराम चौधरीहे प्रदान कैना निर्णय करल बा ।
कैलाली जनपुस्तकालयसे प्रतिभा छनौट समितिके सिफारिसके आधारमे उ निर्णय करल हो । झण्डे तीन दशक शैक्षिक सेवामे बिटाइल चौधरी नम्मा समयसे धनगढीके चर्चित एसपिए कलेजके प्राध्यापक तथा सहायक क्याम्पस प्रमुख हुके सेवारत बटै । टमान सामाजिक संघसंस्थासंग समेत संलग्न चौधरी वाणिज्य संकायके अब्बल प्राध्यापक हुइट ।
साहित्यकार तथा धनगढीके पूर्व नगर शिक्षा अधिकारी महादेव जोशीसे अपन दिवंगत धर्मपत्नी स्व.तिलोत्तमा जोशीके सम्झनामे पुस्तकालयमे अक्षयकोष जम्मा करके उ पुरस्कार स्थापना करल हुइट ।
कैलाली जनपुस्तकालयके अध्यक्ष तथा सुदूरपश्चिम प्रज्ञा प्रतिष्ठानके उपकुलपति डा.टीएन जोशीसे पुस्तकालयके वार्षिकोत्सवके अवसरमे फागुन २० गते उ पुरस्कार प्रदान कैना बटैलै । पुरस्कारको राशि ११ हजारसहित सम्मान पत्र रहल बा ।
