बोण्ड बोडिङ स्कूलके १५औं बार्षिकोत्सव
पहुरा समाचारदाता
हसुलिया, ९ फागुन । कैलालीके कैलारी गाउँपालिका वडा नम्बर ५ पवेरामे रहल बोण्ड बोडिङ स्कूलके १५औं बार्षिकोत्सव अभिभावक दिवस मंगरके रोज भव्यताके साथ सम्पन्न हुइल बा ।
कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरीके वडका पहुनामे हुइल कार्यक्रममे उहाँ संस्थागत विद्यालय अभिभावकहुकनके परिकल्पना पुरा कैनामे सफल हुइल बटै ।
सामुदायिक विद्यालयमे निःशुल्क शिक्षा प्रदान कैजाइठ,’ उहाँ कहलै, ‘मने विद्यार्थीहुक्रे प्रतिस्पर्धा करे नइसेकल कारण अभिभावकहुक्रे अपन लर्कनहे संस्थागत विद्यालयमे पह्रैटी रहल बटै ।’ परिक्षाफलके परिणामके हिसाबसे संस्थागत विद्यालयके पह्राई सन्तुष्टी डेखल उहाँ बटैलै । विद्यालयमे समय सुहैना पाठयक्रम नन्नाफे उहाँ सुझाव डेलै ।
कार्यक्रमके विशिष्ट पहुना कैलारी गाउँपालिकाके शिक्षा शाखा प्रमुख गणेश प्रसाद मिश्र विद्यार्थीनहे प्राविधिक शिक्षासे जोरे पर्ना बटैलै । धोकन्टे शिक्षासे विद्यार्थीनके जीवनमे परिवर्तन नाने नइसेक्जाई’, उहाँ कहलै, ‘आब व्यावहरिक शिक्षा लागु करे पर्ना जरुरी बा ।
विद्यार्थीनहे भविष्य बनाइक लाग शिक्षकसंगे अभिभावकफे ओटरे जिम्मेवार हुई पर्ना उहाँ बटैलै । कैलारी गाउँपालिकामे ४४ ठो सामुदायिक विद्यालय ओ १४ ठो संस्थागत विद्यालय रहलमे संस्थागत विद्यालयके नतिजा सन्तोषजनक डेखलफे उहाँ बटैलै ।
जनकल्याण मावि पवेराके पूर्व शिक्षक ध्रुव नारायण राउट विद्यार्थीनहे कितावी ज्ञानसंगे संस्कारफे सिखाई पर्ना जरुरी रहल बटैलै । लर्कनहे विद्यालय पठाके केल नई । ओइने विद्यालय पुग्लै की नइ, पह्राई कैसिन चल्टा अभिभावकफे जागरुक हुई पर्ना बा’, उहाँ कहलै, ‘अभिभावक विद्यार्थीनहे घरेफे पह्रना वातातरण मिलैनाके साथे नैतिक संस्कार सिखैना जरुरी बा ।’
कार्यक्रममे अभिभावक दिनेश बोहरा, संचारकर्मी प्रेम चौधरी, गगन एकेडेमीके प्न्सििपल रबिन्द चौधरी, पवेरा प्राथमिक स्वास्थ्य केन्द्रके सिनियर अनमी पार्वती चौधरी, नागरिक उन्मुक्ती पार्टी क्षेत्र नम्बर ३ के सचिव ललित ओली, पवेरा बजार व्यवस्थान समितिके अध्यक्ष सन्तराम चौधरीलागायत विद्यालयके बार्षिकोत्सव तथा अभिभावक दिवसके शुभकामना मन्तव्य व्यक्त रहिट ।
विद्यालय व्यवस्थापन समितिके अध्यक्ष भीमबहादुर बोहराके अध्यक्षतामे हुइल कार्यक्रममे विद्यालयके संस्थापक प्रिन्सिपल तिलक बोहरा विद्यालयकेबारेमे जानकारी करैटी अभिभावकहुक्रे घरेफे लर्कनके हेरचाह कैडेना आग्रह करलै । विद्यालयमे डेहल गृहकार्य लर्कन करलै की नइकरलै अभिभावकफे चेकजाँच कैडेना उहाँफे आग्रह करलै ।
२०६४ मा स्थापना हुके यी बोण्ड ई बोर्डिङ स्कुलले शिक्षाके बृद्धी ओ बिकासमे महत्वपूर्ण भूमिका खेल्टी आइल बा । प्राथमिक तहसे संचालन हुइल यी विद्यालय आज आधारभुत तह सम संचालन हुइल बा । निकट भबिष्यमे माबि तह सम संचालन कैना संस्थापक प्रिन्सिपल बोहरा बटैलै ।
कार्यक्रमके संचालन विद्यालयके भाइस पिन्सिपल बम बहादुर धामी करले रहिट । बार्षिकोत्सव कार्यक्रममे खेलकुद, शैक्षिक क्रियाकलापके प्रमाणपत्र तथा पुरस्कार वितरण कैगिल बा । कार्यक्रममे विद्यार्थीन टमान सांस्कृतिक नाँचगानफे डेखागिल बा ।
