गाउँपालिकाके सहयोगमे दृष्टिविहिनके घर बत्ती बरल

दिलबहादुर चौधरी
टीकापुर, १० फागुन । जानकी गाउँपालिका वडा नं. ७ मकरीके गोरे चौधरीके दम्पति जन्मजात दृष्टिविहिन ओ आर्थिक कठिनाईसे विद्युत सेवासे बञ्चित रहल बेला जानकी गाउँपालिकासे विद्युत जडान करेबेर बालबालिकाके पढाईमे सहजता पुगल बा ।

जानकी गाउँपालिका वडा नं. ७ मकरी गाउँके गोेरे चौधरी जन्मजात दृष्टिविहिन हुइट । ५४ वर्षिया चौधरी बाह्य वातावरणके खुल्ला नजरसे आनन्दके अनुभुति करे पाइल नइहुइट कलेसे अब्बेक समयमे समेट विद्युत सेवासे वञ्चित रहल बटै । रात हुईबेर छरछिमेकके घर बत्तीसे झलमल्ल हुइलेसेफे उहाँके घर विगत ढाई वर्षसे अन्धारमय रहल बा । दुनु दम्पती दृष्टिविहिन ओ आर्थिक कठिनाईसे उहाँ विद्युत सेवाके पहुँचमे नइपुगके उहाँहुकनके घरमे विद्युत सेवा पुगे नइसेकल हो । नम्मा समयसम दृष्टिविहिनहे अन्धकारमय रात जिए पर्ना बाध्यताके बारेमे वडा हुइटी जानकी गाउँपालिकासम जानकारी पुगेबेर गाउँपालिकासे उहाँहुकनके घरे विद्युत जडान सहित आवश्यक बत्तीके व्यवस्था करके सहयोग करल जानकी गाउँपालिकाके अध्यक्ष गणेश चौधरी बटैलै ।

दृष्टिविहिन हुइलेसेफे अपन सन्तानहुकनके भविष्यमे चिन्तित रहल दम्पतिसे बालबालिकाहे नियमित विद्यालयमे पठैना करल बटै । दिनभर विद्यालयमे पढके लौटेबेर साँझ तथा रातके समयमे बत्ती नइहुके बालबालिका कबु पह्रे नइपैना हुइल ओरसे अपनेहुकनहे आत्मगलानी हुइटी रहल अवस्थामे जानकी गाउँपालिकासे अपन समस्याहे बुझके सहयोग करलमे धन्यवादके साथे आबके दिनमे अपन बालबालिका बत्तीके ओजरारमे बैठके पह्रे पैना हुईबेर ओइने खुशी व्यक्त करले बटै ।

दृष्टिविहिन दम्पतिके ३ सन्तान रहल बटै । दुई सन्तान स्थानीय विद्यालयमे अध्ययनरत रहल बटै कलेसे एक ठो काखे सन्तान रहल बटै । ४ भैया रहल उहाँहुक्रे ढाई वर्ष आघे केल घर छुटल रहिट । अपने दृष्टिविहिन दम्पतिहे भैयाहुक्रे अलग कराइल पीडा हुइलेसेफे सर्घषमय जीवन व्यतित करटी रहल उहाँहुक्रे बटैले बटै । सम्पतिके नाउँमे छोट घर ओ ४ घेरा खेतुवा केल रहल ओरसे आर्थिक कठिनाईसे गुज्रटी रहल जीवनहे सरकारके सामाजिक सुरक्षाभत्तासे कुछ राहत प्रदान करल उहाँहुक्रे बटैले बटै । सामाजिक सुरक्षा भत्तासे अपनेहुकनके दैनिकी चल्टी रहल ओरसे अपन छाई छावाहे आबके दिनमे कुछ हुइलेसेफे शिक्षाके पहुँचमे धारके मजा शिक्षा डेना अपनेहुकनके धोको रहल बटैलै ।

अपनेहुकनके दम्पतीके जीवन जस्टे अन्यके जीवन नहोए कहिके उ दम्पतिसे कुछ सामाजिक कार्यमे अग्रसरता डेखल बटै । विशेष करके दृष्टिविहिनहे सहयोग पुग्न करके अब्बे काम करटी रहल दृष्टिविहिन फुलकुमारी चौधरी बटैली ।