रजत जयन्तीके उपलक्ष्यमे एसपीएसे मानव सेवा आश्रमहे आर्थिक सहयोग
पहुरा समाचारदाता
धनगढी, ११ फागुन । रजत जयन्ती (२५औं वार्षिकोत्सवक)के उपलक्ष्यमे एसपीए कलेज धनगढीमे रहल मानव सेवा आश्रमहे १ लाख रुपैयाँ आर्थिक सहयोग करले बा ।
बिफेक रोज मानव सेवा आश्रमके धनगढीस्थित प्रदेश कार्यालयमे जाके कलेजके प्रबन्ध निर्देशक सुवाश शाही उक्त रकम आश्रितहुक्रनके उपस्थितिमे आश्रमके प्रदेश आदर्श ढकालहे हस्तान्तरण करल रहिट ।
रकम हस्तान्तरण कैटी शाही रजत जयन्तीमे भड्किलो कार्यक्रम कैनासे मानव सेवाके लाग खर्च कैना उपर्युक्त रहल ओरसे उक्त सहयोग करल बटैलै । उहाँ अन्य संस्था फेन आपन कार्यक्रमके बजेट कटौती कैके मानव सेवामे खर्च कैना ट्रेन्ड बैठाइ पर्र्ना सुझाव डेलैै ।
‘सबसे बरवार धर्म कहलक सेवा हो । उहीसे औरे कुछ नैहो,’ शाही कहलै, ‘रजत जयन्तीके अवसरमे हमार करल सहयोगसे समारोह ढेर भड्किलो बनैनासे मानविय सेवामे खर्च करे परठ् कना सन्देश डेहे खोजल हुइटी ।’
मानव सेवा आश्रमके धनगढी कार्यालयमे ५२ जाने असहाय आश्रित रहल बाटै । ओइनके लालन पालन तथा खानाके व्यवस्था आश्रमसे कैटी आइल बा । उ आश्रितहुक्रनके खाना, बैठ्ना ओ लालनपालन तथा उपचारमे सहयोग पुगे कना उद्देश्यसे एसपीए उक्त सहयोग करल हो ।
साथे प्रबन्ध निर्देशक शाही आश्रमके भवन निर्माणमे एकठो कोठा निर्माणके प्रायोजन समेत एसपीएसे कैना प्रतिबद्धता जनैलै ।
सहयोग हस्तान्तरणपाछे क्याम्पस प्रमुख योगराज गौतम मानवीय सेवामे जोरे पाइलमे एसपीए परिवारमे खुशीयाली छाइल बटैलै ।
‘इहीसे हम्रहीनहे खुशीयाली प्रदान करले बा,’ गौतम कहलै, ‘निस्वार्थ प्रेमिल भावसे छोट सहयोग करेबर ढेर सहयोग हुइठ् । सामाजिक उत्तर दायित्व अन्तर्गत समाजके टमान अंगसे जोरे पाइलमे एसपीए परिवार अन्तत्यै खुशी हुइल बा । आश्रममे रहल सक्कु जनहनके सुस्वास्थ दीर्घायूके कामना करटी ओ सेवा कैना अवसर डेहलमे आश्रम प्रति हार्दिक आभार व्यक्त करटी ।
आश्रमके संयोजक ढकाल सुदूरके शैक्षिक नेतृत्व हँक्टी रहल एसपीए कलेजसे मानविय सेवामे डेखाइल अग्रसरताप्रति सम्मान व्यक्त करलै । उहाँ एसपीएके इ कदमसे अन्य संस्थाहे फेन मानवसेवामे लग्ना उत्प्रेरित कैना उहाँ विश्वास व्यक्त करलै ।
उ अवसरमे एसपीएके कार्यक्रम निर्देशक मनोज भट्ट (बीबीएस), डिल्लीराज भण्डारी(बीएचएम), पुष्पराज ओझा(एमबीएस), उषा साहु (प्लस टू) प्रकाश बलायर(प्रशासकीय प्रमुख) आश्रितहे खाजा खवाइल रहिट । एसपीए शुकके एक समारोहके बीच आपन २५औं वार्षिकोत्सव मनैटी रहल बा ।
