कैलारीमे गाउँपालिका उपाध्यक्षहे हात्तीपाइले रोग विरुद्धके औषधी खवाके अभियान सुरुवाट

पहुरा समाचारदाता
हसुलिया, ११ फागुन । कैलालीके कैलारी गाउँपालिकामे गाउँपालिका उपाध्यक्ष भगवतीकुमारी चौधरीहे हात्तीपाइले रोग विरुद्धके औषधी खवाके अभियान सुरु हुइल बा ।

कैलारी गाउँपालिका वडा नम्बर ५ वडका पलियाके शिव मन्दिरमे आयोजना करल अभियानके प्रमुख अतिथि रहल गाउँपालिका उपाध्यक्ष भगवतीकुमारी चौधरीहे औषधी खवाके अभियान सुरुवाट हुइल रहे । कार्यक्रममे उहाँ सक्कु गाउँपालिकाबासीहुकनहे औषधी खाके अभियानहे सफल बनैना आग्रह करली ।

दशौं पटकफे औषधी खवाईबेरफे लक्ष्य प्राप्त हुई नइसेकलपाछे अशौफे हात्तीपाइले रोग विरुद्धके औषधी खवैटी रहल कैलारी गाउँपालिका स्वास्थ्य शाखाके प्रमुख नरेश चौधरी बटैलै । सुदूरपश्चिम प्रदेशके सबसे ढेर जनसंख्या रहल कैलाली जिल्लाके ६५ प्रतिशतसे ६ बरस लगातार अनिवार्य औषधी सेवन नइकरल कारण लक्ष्य प्राप्त हुई नइसेकल हो । सुदूरपश्चिमके ९ जिल्ला मन्से आठ जिल्ला निवारण हुइलेसेफे कैलाली जिल्लाले मात्रै औषधी सेवनको लक्ष्य चुमे नइसेकल हो ।

गर्भवती महिला, ७ दिन भिटरके सुत्केरी, २ बर्ष टरेक बालबालिका, सिकिस्त बिरामी बाहेकसे हात्तीपाइले विरुद्धके औषधी खाई पर्ना कहल बा ।

कार्यक्रममे कैलारी गाउँपालिका स्वास्थ्य शाखाके अनिता चौधरी, पवेरा प्राथमिक स्वास्थ्य केन्द्रके सिअनमी पार्वती चौधरी, संगीता चौधरी, स्वास्थ्य कार्यालयके एमडिए कोडनेटर प्रिन्सी भटट, सुनहरा ताल आधारभुत विद्यालयके प्रअ महेन्द्र चौधरी, तीन गाउँक भल्मन्सा, अघरीया, महिला स्वास्थ्य स्वयं सेविकाहुकनके सहभागिता रहे । ओस्टेक करके गाउँपालिकाके सक्कु वडामे हात्तीपाइले रोग विरुद्धके औषधी खवैना कार्यक्रम सुरुवाट हुइल बा ।