रेडक्रस कैलारी उपशाखाके सभापतिमे श्रीराम
पहुरा समाचारदाता
हसुलिया, ११ फागुन । नेपाल रेडक्रस सोसाइटी कैलारी उपशाखाके सभापतिमे श्रीराम चौधरी सर्वसम्मतसे चयन हुइल बटै ।
उपशाखा तदर्थ समितिके पहिल अधिवेशनसे श्रीराम चौधरीके सभापतित्वमे ११ सदस्यीय लौवा कार्यसमिति चयन हुइल हो । समितिके उपसभापतिमे मीना चौधरी, सचिवमे रामशंकर चौधरी, सहसचिवमे तुल्सी प्रसाद चौधरी, कोषाध्यक्षमे सविता चौधरी ओ सह कोषाध्यक्षमे रामस्वरुप चौधरी चयन हुइल बटै ।
ओस्टेक महिला सदस्यमे बन्दना चौधरी, खुल्ला सदस्यमे रामकृष्ण चौधरी, आशिष चौधरी, विरबहादुर चौधरी ओ मोहनलाल चौधरी चयन हुइल बटै ।
यिहीसे आघे कैलारी गाउँपालिकाके अध्यक्ष राजसमझ चौधरी वडका पहुना ओ गाउँपालिका उपाध्यक्ष भगवतीकुमारी चौधरी विशिष्ट पहुनामे उपशाखा तदर्थ समितिके पहिल अधिवेशनसे शत्र कार्यक्रममे हुइल रहे । उदघाटन कार्यक्रममे बोल्टी गाउँपालिका अध्यक्ष राजसमझ चौधरी कैलारी गाउँपालिका बाढी डुबानसंगे सिकलसेल रोगसे पीडित रहल बटैलै । लौवा कार्यसमितिहे निश्वार्थ भावना लेके काम कैना आग्रह करलै ।
कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी लौवा कार्यसमितिहे मानव धर्म सेवाके लग्ना आग्रह करली । उहाँ कहली, कैलारी गाउँपालिका बाढी, डुबान, आगलागीके उच्च जोखिममे रहल बा । यी क्षेत्रमे रेडक्रससे सहयोग करटी आइल बा ।’
उदघाटन कार्यक्रममे नेपाल रेडक्रस सोसाइटी कैलालीके सभापति बासुदेव विनाडी, उपसभापति जगदीश्वर पण्डित, जिल्ला सदस्य दीपा आचार्य लगायत मन्तव्य व्यक्त करले रहित । कार्यक्रम उपशाखाके सभापतिमे श्रीराम चौधरीके अध्यक्षतामे हुइल रहे । कार्यक्रममे स्वागत मन्तव्य कोषाध्यक्ष सविता चौधरी करले रहिट । संचालन सचिव रामशंकर चौधरी करले रहिट । कैलारीमे यिहीसे पहिले नेपाल रेडक्रस सोसाइटी उपशाखाके तदर्थ समिति रहे ।
