बोराडाँडी ब्यारेकमे सैनिक प्रदर्शनी
पहुरा समाचारदाता
धनगढी, १२ फागुन । नेपाली सेनासे बोराडाँडी ब्यारेकमे विविध सैनिक प्रदर्शनी आयोजना करले बा ।
सुदूरपश्चिम पृतना हेडक्वाटरसे महाशिवरात्री तथा नेपाली सेनाके २६० औं स्थापना दिवसके अवसरमे सैनिक प्रदर्शनी आयोजना करल हो । शकके रोज सुदूरपश्चिम प्रदेश प्रमुख देवराज जोशी एक समारोहके प्रदर्शनीके उद्घाटन करल रहिट । शुक ओ शनिच्चरके दुई दिनसम सर्वसाधारणके लाग प्रदर्शनी खुला करल जनाइल बा ।
नेपाली सेनासे हरेक बरस महाशिवरात्री अर्थात् सेना दिवसके दिन काठमाडौके सैनिक मञ्चमे टमान सैनिक कवाज, युद्ध कौशल डेखैटी आइलमे इ बरससे प्रदेश स्तरीय सैनिक प्रदर्शनी राखल सुदूरपश्चिम पृतनापति उपरथी विजय थापा बटैलै ।
पृतनापति थापा नागरिक सैनिक सम्बन्धके विकास कैना सेनासे टमान माध्यमसे काम करटी रहल बटैलै । टमान विपद्के समयमे नेपाली सेनासे जनस्तरमे जाके काम कैना करल स्मरण कैटी पृतनापति थापा नागरिकसँग थप सम्बन्ध विकास करक लाग सैनिक प्रदर्शनी राखल बटैलै ।
शुकके रोज नेपाली सेनाके टमान युनिटसे विविध साँस्कृतिक झाँकी प्रदर्शन करल रहे । ओस्टके, खुकुरी ड्रिल प्रदर्शन, एरोविक नृत्य, तेक्वान्दो प्रदर्शन ओ एनसीसी विद्यार्थीहुक्रनसे नृत्य ओ कवाज प्रदर्शन करल रहे ।
प्रदर्शनीमे नेपाली सेनासे प्रयोग कैना टमान हतियार, उपकरण, औजार ओ रिफ्रेसमन्टके लाग जिप लाइनके व्यवस्था करल बा ।
