समृद्ध सुदूरपश्चिम निर्माणके लाग सबके भूमिका आवश्यक
पहुरा समाचारदाता
धनगढी, १२ फागुन । समृद्ध सुदूरपश्चिम निर्माणके लाग सक्कु क्षेत्रसे आआपन भूमिका खेले पर्ना एक कार्यक्रमके सहभागिहुक्रे जोड डेले बाटै ।
शुकके रोज धनगढीमे हुइल आत्मनिर्भर सहितके समृद्ध सुदूरपश्चिम निर्माणके लाग सरोकारवालाहुक्रनके भूमिका विषयक अन्तरक्रिया कार्यक्रमके सहभागीहुक्रे ओम्ने जोड डेहल हुइट ।
राष्ट्रिय मानव अधिकार आयोग सुदूरपश्चिम प्रदेशके मानव अधिकार अधिकृत गणेश जोशी प्रदेशके समग्र विकासके लाग सक्कु जाने आआपन क्षेत्रसे इमान्दारी पूर्वक आपन भूमिका निर्वाह कैना आवश्यक रहल बटाइल रहिट ।
‘अकली प्रदेशके विकासके विकासके लाग कुछ नैकरे सेकजाइ’, उहाँ कहलै–‘ओकर लाग राजनीतिकर्मी, सरकारी तथा गैरसरकारी क्षेत्रके साथे सक्कु जाने आआपन क्षेत्रसे इमान्दारीपूर्वक आपन भूमिका निर्वाह कैना आवश्यक रहल बा ।’
कैलाली उद्योग वाणिज्य संघके महासचिव ओम विष्ट प्रदेशके विकासके लाग प्रदेस सरकारसे ऐन कानून तथा योजना निर्माणसे लेके यहाँके व्यवसायीहुक्रनके लाग व्यवसायमैत्री तथा लगानीमैत्री ओ सहजरुपमे काम कैना वातावरण बनैना आवश्यक रहल बटाइल रहिट ।
उहाँ प्रदेशमे व्यवसायीहुक्रनके लाग व्यवसायमैत्री, लगानीमैत्री वातावरण नैहोके फेन यहाँके विकास नैहुइसेकल औँल्याइल रहिट । ओकर साथे उहाँ प्रदेश सरकारसे उत्पादित वस्तुके बजारमुल्यसे लेके आयात निर्यातके लाग फेन वातावरण बनैना फेन जरुरी रहल बटाइल रहिट ।
‘प्रदेश सरकारसे व्यवसायीहुक्रनके लाग व्यवसायमैत्री, उद्योग सञ्चालनके लाग लगानीमैत्री ओ सहज रुपमे काम कैना वातावरण बना डेहे परल’, उहाँ कहलै–‘उहीसे यहाँके उद्योगी व्यवसायी अपने ठाउँमे पुँजी लगानी कैही जिहीसे यहाँके समृद्ध विकासमे टेवा पुग्नाके साथ अपने गाउँठाउँमे रोजगारीके सृजना फेन हुइ ।’
नेपाली काँग्रेसके रामबहादुर देउवा समग्र प्रदेशके विकासके लाग कृषि, पर्यटन क्षेत्रके पहिचानसे लेके कृषिसे उत्पादित बस्तुभाउके बजारीकरणके सहज वातावरण प्रदेश सकारसे बनाडेहे पर्ना पर्ना बटाइल रहिट ।
कार्यक्रममे फियान नेपालके कार्यकारी निर्देशक अशोक बहादुर सिंह समृद्ध सुदूरपश्चिम निर्माणके लाग सरोकारवालाहुक्रनके भूमिका विषयक आपन प्रस्तुती राखल रहिट । उहाँ प्रदेशके विकासके लाग गुरु योजना बनाके कार्यान्वयन कैना, शिक्षा, स्वास्थ्य आवासके लाग ऐन कानून निर्माणसे कार्यान्वयन कैना, कृषि, पर्यटन विकास निर्माणके लाग मास्टर प्लान बनाके कार्यान्वयन करे पर्नामे जोड डेहल रहिट ।
कार्यक्रममे प्रदेश सभा सदस्य रमेश धामी सुदूरपश्चिम प्रदेश सक्कु क्षेत्र ओर पछगुरल बटैटी यहाँके विकासके लाग प्रदेश सरकारसे कार्यान्वयनके लाग पहल कैना बटाइल रहिट ।
ओस्टके उहाँ समद्ध सुदूरपश्चिमके विकासके लाग सरोकारवालाहुक्रनसे राखल माग मुद्धा तथा समस्याहे प्रदेश सरकारसे सम्बोधनके लाग फेन अपने मुख्य भूमिका खेल्ना बटाइल रहिट ।
प्रदेश सभा सदस्य खेमा विष्ट फेन प्रदेशके समग्र विकासके लाग अपने चिन्तित रहल बटाइल रही । उहाँ प्रदेशके जनताहुक्रनके खाद्य, शिक्षा, स्वास्थ्य लगायत आवासके लाग आवाज उठैना बटैली ।
कार्यक्रममे प्रदेश नीती तथा योजना आयोग सुदुरपश्चिमके दिपिका भट्ट, गैरसरकारी संस्था महासंघ सुदूरपश्चिमके देवी खनाल, राप्रपा सुदूरपश्चिमके प्रवक्ता छत्र शाही, खाद्य अधिकारका लागि राष्ट्रिय सञ्जालके विदुर सुवेदी लगायत आपन विचार राखल रहिट ।
