महिला क्रिकेटरसहित टमान जाने सम्मानित
पहुरा समाचारदाता
धनगढी, १२ फागुन । धनगढीमे रहल सुदूरपश्चिमाञ्चल एकेडेमी(एसपीए कलेज)के रजत जयन्तीके उपलक्ष्यमे राष्ट्रिय महिला क्रिकेटर ओ टमान व्यक्तित्व सम्मानित हुइल बटै ।
सुनसरीके इटहरीमे यिहे वर्ष हुइल प्रधानमन्त्री कप महिला राष्ट्रिय टी–२० क्रिकेट प्रतियोगिताके उपाधि जित्टी इतिहास रचल सुदूरपश्चिमके टोलीमे रहल ४ जाने महिला क्रिकेटरहे कलेजसे नगदसहित सम्मानपत्र प्रदान करल हो ।
सम्मानित हुइलमे कविता कुँवर, इश्वरी विष्ट, मनिषा चौधरी ओ रुवि पोदार बटै । प्रधानमन्त्री कपके फाइनल खेलके अन्तिम ओभरमे जितके लाग आठ रन आवश्यक रहल बेला एसपीएमे अध्ययनरत कविता कुँवर लगातार दुई छक्का प्रहार करटी सुदूरपश्चिमहे पहिल चो महिला राष्ट्रिय क्रिकेटके उपाधि डेहुवाइल रहिट ।
सक्कुहुनहे एसपीएके अध्यक्ष योगेन्द्रबहादुर शाही, प्रमुख अतिथि तथा सुदूरपश्चिम प्रदेशके भौतिक पूर्वाधार विकास मन्त्री प्रकाश बहादुर देउवा, प्रबन्ध निर्देशक सुवाश शाही ओ क्याम्पस प्रमुख योगराज उपाध्यायसे सम्मान करले रहिट ।
ओस्टेक करके दुईवर्षआघे मलेसियामे सम्पन्न पाँचौ गोजुरियो विश्व कराँते च्याम्पियनसीपमे नेपालके लाग रजत पदक डेहुवाइल एसपीएके विद्यार्थी कमल ओलीहेफे कलेजसे सम्मान करले बा ।
ओस्टेक करके रजत जयन्तीके अवसरमे पूर्ण क्याम्पस प्रमुख हेमराज जोशी, पुष्पराज जोशी, शिवराज श्रेष्ठ ओ मोहनराज भट्टहेफे कलेजसे कदरपत्र ओ दोसल्लासहित सम्मान करले बा । उ बाहेक सामाजिक क्षेत्रके व्यक्तित्व प्राडा हेमराज पन्त, गेटा आँखा अस्पतालके निर्देशक डा. सुरेश पन्त, सुदूरपश्चिम प्रज्ञा प्रतिष्ठानके उपकुलपति डा. टीएन जोशी, पूर्व विद्यार्थी पूर्णनन्द जोशी, राजकुमारी महतो, अमेरिकी कर्नर धनगढी, पुर्नवास नगरपालिकाके उपमेयर तथा कलेजके पूर्व विद्यार्थी भूलिया रानाहेफे कदरपत्र ओ दोसल्लासहित सम्मान करल बा ।
ओस्टेक करके कलेजके सहायक प्राध्यापक बुधराम चौधरी ओ लाइब्रेरियन कृष्णा जोशीहे नगद ओ सम्मानपत्रसहित दीर्घ सेवा पदक डेहल बा । रजत जयन्तीके अवसरमे वरिष्ठताके आधारमे उपप्राध्यापक सुशीला चन्द, उपप्राध्यापक रघुनाथ जोशी ओ सहायक प्रशासक तारा बलायर नगद ओ सम्मानपत्रसहित सम्मानित हुइल बटै ।
ओस्टेक करके उत्कृष्ट प्राध्यापक ओ कर्मचारीके अवार्ड रामसेवक चौधरी, यज्ञराज जोशी, भरत जोशी, दीपेन्द्र जोशी, टिकेश्वरी शर्मा ओ तोयनाथ पन्त पैले बटै । ओइनेफे नगदसहित सम्मानपत्र पैलै ।
ओस्टेक करके रजत जयन्ती समारोहमे उत्कृष्ट क्लवके अवार्ड एसपीएके थियटर एण्ड आर्टस क्लव पैले बा । विद्यार्थीहुकनहे रुचि अनुसारके क्षेत्रमे आघे बढैना ओ सामाजिक परिवेशसंग घुलमिल करैना एसपीसे टमान १५ ठो क्लव गठन करले बा ।
विद्यार्थीहुक्रे जौन क्षेत्रमे भविष्य निर्माण करे चाहठै, उहे क्लवमे आवद्ध हुई सेक्ठै ओ ओइनहे उहेअनुसारके प्रशिक्षण, ट्रेनिङ, सेमिनारके व्यवस्था कलेजसे करडेना करल बा ।
जेम्ने एसपीएके थियटर्स एण्ड आर्टस क्लवसे नाटक प्रदर्शनीसे नगद ५० हजारसहित राष्ट्रियस्तरके पुरस्कार समेत जिटल रहे । क्लवसे चौराहा ओ अत्तरियामे सडक नाटक प्रदर्शनी कैनाके साथे सुदूरपश्चिममे पहिल चो क्यान्भास पेन्टिङ समेत आयोजना करल रहे । ओस्टेक करके रजत जयन्तीके अवसरमे अभिभावक धर्मदेव न्यौनाल ओ रुपेश खरालहेफे कलेजसे अभिनन्दन करले बा ।
ओस्टेक करके पूर्व क्याम्पसप्रमुख शिवराज श्रेष्ठसे स्थापना करल अक्षय कोषसे स्थापित शिव–बिमा उत्कृष्ट कर्मचारी पुरस्कार कलेजके सहायक लेखापाल मानबहादुर रावल ओ शिव–बिमा उत्कृष्ट विद्यार्थी पुरस्कार शिखा गौतम प्राप्त करलै ।
ओस्टे नौलो उडान फाउन्डेशनसे रजत जयन्तीके अवसरमे अर्जुन बाग ओ लक्ष्मी कुँवरहे नगदसहित छात्रवृत्ति प्रदान करल रहे । ओस्टे रजत जयन्ती समारोहमे पूर्णनन्द गरिब तथा जेहोन्दार विद्यार्थी छात्रवृत्तिहे कृष्ण बोहरा ओ कविता भट्ट पैले बटै ।
