सांसद चौधरीके नाम मतदाता नामावलीहे समावेश

पहुरा समाचारदाता
धनगढी, १२ फागुन । राष्ट्रपति निर्वाचनके लाग प्रतिनिधिसभा सदस्य अरुणकुमार चौधरीके नाम मतदाता नामावलीमे समावेश कल बा ।

मतदाता नामावलीमे नाम समावेश कैना ओ विवरण सच्यइक लाग परल निवेदनके आधारमे चौधरीके नाम मतदाता नामावलीमे समावेश करल निर्वाचन अधिकृतके कार्यालय जनैले बा । ट्र्याक्टर आगजनी करल अभियोगमे सांसद चौधरीहे अदालतसे दोषी ठहर करल रहे । उहाँहे माघ १९ गते प्रहरी नियन्त्रणमे लेके कारागार चलान करल रहे । उ प्रकरणपाछे सांसद चौधरी निलम्बित हुइल रहिट । प्रजातन्त्र दिवसके अवसरमे राष्ट्रपतिसे कैद मिनाहा हुइल पत्र संघीय संसद् सचिवालय पुगलपाछे उहाँक निलम्बन फुकुवा हुइल रहे ।

उहाँ यिहे गैल अँटवार कारागार मुक्त हुइल रहिट । निलम्बन फुकुवा हुइलसंगे उहाँक सांसद पद कायम हुइल बा । निर्वाचन अधिकृतके कार्यालयसे प्रतिनिधिसभा सदस्य संगीता मण्डल धानुक, राष्ट्रियसभा सदस्य दुर्गाकुमारी गुरुङ, प्रदेशसभा सदस्य सरस्वती खड्का ओ सञ्जुकुमार चौधरीके विवरण सच्याइल सहायक निर्वाचन अधिकृत अमृताकुमारी शर्मा जानकारी डेलै ।