सूचना प्रविधि प्रदर्शन मेलाके तयारी अन्तिम चरणमे
पहुरा समाचारदाता
धनगढी, १३ फागुन । कैलालीके धनगढीमे आयोजना हुई लागल सूचना प्रविधि प्रदर्शन ‘मेला’ (क्यान इन्फोटेक) २०७९ के तयारी अन्तिम चरणमे पुगल बा ।
कम्प्युटर एशोशियसन नेपाल कैलालीके आयोजनामे फागुन १६ गते से २० गतेसम हुई लागल मेलाके तयारी अन्तिम चरणमे रहल शनिच्चरके रोज पत्रकार सम्मेलनके आयोजना करके जानकारी डेहल हो ।
प्रदर्शनीके यी दुसरा संस्करण हो । धनगढीमे २०७२ सालमे ओम प्यालेसमे प्रथम प्रदर्शनी शुरु हुइल रहे । दुसरा संस्करण सन २०२० मे सञ्चालन कैना हुइलेसेफे कोभिड महामारीके कारण हुई नइसेकल रहे ।
आयोजक एसोसियनसनके अध्यक्ष यज्ञराज ओझा दुसरा संस्करण २०२० मे सञ्चालन कैना कहलेसेफे कोभिड महामारीके कारण करे नइसेकल बटैलै ।
सात बर्षपाछे सञ्चालन हुई लागल मेलाहे प्रविधिके सामाग्री खरिद विक्रीसेफे सूचना, जानकारी तथा प्रविधिके विकासमे जोड डेना बा । मेलामे सूचना प्रविधिके बारेमे जानकारी डेना, नविनतम प्राविधिक सामग्रीके प्रदर्शनी कैना, साईबर सेक्युरेटि सम्बन्धी जानकारी डेना मुल आयोजक समितिके संयोजक नरेन्द्रसिंह धामी बटैलै ।
इन्फोटेक मेला मुल संयोजक नरेशसिंह धामीके अनुसार देश विदेशमे भिटरल नविनतम प्रविधिके बारेमे मेलामे जानकारी डेना बा ।
ओस्टेक करके सक्कु मेरिक प्रविधिके एक्के ठाउँमे प्रदर्शनी कैना बा । यकर साथे प्राविधिक शिक्षा अध्ययनरत विद्यार्थीहे लक्षित करके सेमीनारके फे आयोजना कैना बा । ‘पछिल्का समय सामाजिक सञ्चालनसे सरकारी वेभ सर्भरमे साईबर आक्रमण हुई लागल बा ।,’ धामी कहलै, ‘उहीे कैसिक बच्न ओ सुरक्षाके उपाय कैसिक अपनैना कना बारेमे सूचना प्रविधि मेलामे जानकारी करैना बा ।’
प्रबिधिके प्रयोगसंगे बालबालिकाहुक्रे मोबाइल तथा कम्यूटरमे ढेर समय व्यतित कैना करल अवस्थामे ओइनहे गलत डगरमे जैनासे कैसिक रोक्न कना बारेमेफे मेलामे जानकारी करैना इन्फोटेक २०२३ के निर्देशक टेकराज पनेरु बटैलै ।
‘अब्बे बालबालिकासे ढेर समय मोबाइल ओ कम्प्यूटरमे विटैना करल बटै ।’ उहाँ कहलै, ‘बालबालिकासे ओम्ने कैसिन साईट हेर्ना करल बटै कहिके कैसिक पत्ता लगैना कना बारेमेफे मेलामे जानकारी करैना बा ।
उ साईट कैसिक हटैना कना बारेमेफे जानकारी करैना बा । टबमारे इन्फोटेक २०२३ सक्कु नागरिकके लाग महत्वपुर्ण हुइना बा ।’
मेलामे विद्यार्थीसे उत्पादन कैना प्राविधिक सामग्रीकेफे प्रदर्शनी हुइना बा ।
