कैलारीके गाउँसभा अधिवेशनके टिसरा बैठकमे पाँच विद्येयक उप्पर छलफल
पहुरा समाचारदाता
हसुलिया, १४ फागुन । कैलारी गाउँपालिकाके आर्थिक वर्ष २०७९÷०८० गाउँसभा अधिवेशन (हिउँदे अधिवेशन)के टिसरा बैठक अँटवारके रोज हुइल बा ।
गाउँपालिका अध्यक्ष राजसमझ चौधरीके अध्यक्षमे हुइल कार्यक्रममे आघेक बैठकमे पेश करल पाँच ठो विद्येयकबारे छलफल हुइल बा । गाउँ पालिकाके हिउँदे अधिवेशनके दुसरा बैठकमे कैलारी गाउँपालिकाके खानेपानी तथा सरसफाई उपभोक्ता समिति व्यवस्थापन कार्यविधि २०७९, सामाजिक सुरक्षा वितरण कार्यविधि २०७९, फोहोर मैला व्यवस्थापन ऐन २०७९, न्यायिक समिति संचालन कार्यविधि ऐन (पहिलो संशोधन) २०७९ ओ कैलारी गाउँपालिकाके स्वास्थ्य नीति २०७९ प्रस्तुत प्रस्तुत कैगिल रहे ।
बैठकमे शुन्य तथा विशेष समयमे गाउँपालिका उपाध्यक्ष भगवतीकुमारी चौधरी, गाउँपालिका प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम, वडा नम्बर ५ के वडा अध्यक्ष विष्णुप्रसाद चौधरी, वडा नम्बर ६ के वडा अध्यक्ष प्रेमबहादुर चौधरी, वडा नम्बर ३ वडा अध्यक्ष सन्तराम चौधरी, वडा नम्बर ४ वडा अध्यक्ष ठागुराम चौधरी, वडा नम्बर ९ के वडा अध्यक्ष खेमराज चौधरी, वडा नम्बर ८ के वडा अध्यक्ष तारामल कठरिया, वडा नम्बर १ के वडा अध्यक्ष धोजहरिपाल बोहरा पेश हुइल विद्येयकबारे सल्लाह सुझाव डेहल रहिट ।
विद्येयक पास हुइल खण्डमे कार्यान्वयनमे जोड डेना आवश्यक रहल उहाँहुक्रे बटैले रहिट । ओस्टेक गाउँपालिकाके समग्र विकासके लाग समन्वय सहकार्य करटी आघे जरुरी रहलफे उहाँहुक्रे औल्याइले रहिट ।
बैठकमे वडा सदस्य टिकाकुमारी चौधरी, सुन्दरीदेवी चौधरी, पार्वती विका, सुवा परियार, भागुदास चौधरी, अनारकली चौधरी, धनबहादुर राना, आशिक चौधरी, किसुनलाल चौधरी ओ विजय चौधरी अधुरो योजना निरन्तरता डेहे पर्ना, योजना छनौटबारे वडा सदस्यहुकनफे जानकारी कराई, खानेपानी, स्वास्थ्य, कृषि, शिक्षा क्षेत्रमे ध्यान जाई पर्ना बाट राखल रहिट । ओस्टेक करके वडा सदस्यहुकनके सेवा सुविधाबारे स्थानीय सरकारसे ध्यान डेहे पर्ना बाट रख्ले बटै ।
कार्यक्रममे गाउँपालिकाके प्रमुख प्रशासकीय अधिकृत विर बहादुर ऐर, सामाजिक विकास अधिकृत यगम कलेल, टमान शाखाके प्रमुखहुकनके सहभागिता रहे । बैठकमे उठल बाटहे सहकार्य ओ छलफलके माध्यमसे आघे बह्रना प्रतिवद्धतासहित गाउँसभाके दुसर बैठक यिहे फागुन १८ गते बैठना गाउँपालिका अध्यक्ष राजसमझ चौधरी बटैलै ।
