इतिहास रच्न चेलीनहे एसपीएके सम्मान
पहुरा समाचारदाता
धनगढी, १५ माघ । गत माघमे सुनसरीके इटहरीमे हुइल प्रधानमन्त्री कप महिला राष्ट्रिय टी–२० क्रिकेट प्रतियोगिताके उपाधि सुदूरपश्चिमके टोलीसे जित्टी इतिहास रचल रहे । सुदूरपश्चिमके महिला टोलीसे राष्ट्रिय प्रतियोगिताके उपाधि उचालल यी पहिल चो रहे ।
यी उहे पल थियो, जहाँसे महिला क्रिकेटमे विभागीय टोली एपीएफ ओ प्रदेश १ के उपाधि यात्रामे ब्रेक लागल रहे । उ आघेक सक्कु महिला राष्ट्रिय क्रिकेट प्रतियोगिता एपीएफके पोल्टामे जाइट । एकाध प्रतियोगिता प्रदेश १ के पक्षमे रहे । हुइनाफे यी दुनु टोलीमे राष्ट्रिय टोलीके खेलाडी जे भरल रहिट ।
यी प्रतियोगितामे भर यी दुनु टोलीहे पन्छ्यइटी सानदार प्रदर्शन करल रहे । सुदूरके टोलीसे ओकर नायक रहिट, कविता कुँवर ओ मनिषा चौधरी ।
कवितासे एसपीएफविरुद्धके फाइनल खेलके अन्तिम ओभरमे जितके लाग आठ रन आवश्यक रहल बेला लगातार दुई छक्का प्रहार करटी सुदूरपश्चिमहे उपाधि देहुवइले रहिट ।
कवितासे उपाधि केल नाही उहाँ प्रतियोगिताके सर्वोत्कृष्ट खेलाडी ओर उत्कृष्ट ब्याटरफे चुनल रहिट । उ बाहेक भविष्य स्टार खेलाडीके उपमे पैटी उहाँ स्कुटरफे जिटली ।
ओस्टेक प्रतियोगितामे उत्कृष्ट बलरके उपाधि सुदूरपश्चिमके मनिषा चौधरी जिटली । मध्य गतिके बलर उहाँ गण्डकी विरुद्ध ४, बागमती, सेमीफाइनलमे मधेश ओ फाइनलमे प्रदेश एकविरुद्ध २–२ विकेट लेटी सुदूरहे उपाधि डेहुवाइल रहिट ।
यी दुनु खेलाडीसहित उपाधि विजेता टोलीके सदस्यहुक्रे ईश्वरी विष्ट ओ रुवि पोदार धनगढीके सुदूरपश्चिमाञ्चल एकेडेमी(एसपीए) कलेजमे अध्ययनरत बटै । कलेजसे रजत जयन्तीके उपलक्ष्यमे शुकके उहाँहुकनहे नगद ओ सम्मानपत्र सहित सम्मानित करल बा । सक्कुहुनहे कलेजमे छात्रवृत्तिमे अध्ययन करठै ।
उहाँहुकनहे सुदूरपश्चिम प्रदेशके भौतिक पूर्वाधार विकासमन्त्री प्रकाशबहादुर देउवा, एसपीएके अध्यक्ष योगेन्द्रबहादुर शाही, प्रबन्ध निर्देशक सुवास शाही, क्याम्पस प्रमुख योगराज उपाध्यायसे सम्मान करल रहिट ।
यी मन्से कविता कुँवर राष्ट्रिय टोलीके महत्वपूर्ण अलराउण्डर हुइट कलेसे बाँकी सक्कु खेलाडीसे उमेर समूहमे देशके जर्सी लगा सेक्ली । महिला खेलाडीहुकनहे थप प्रोत्साहन मिले कना उदेश्यसे सम्मान करल क्याम्पस प्रमुख योगराज उपाध्याय बटैलै ।
‘हमार कलेजमे अध्ययनरत चेलीहुक्रे अपन भूमिके पहिचानके लाग करल कार्यसे हम्रहिनहे गौरम्वाम्वित बनैले बा,’ क्याम्पस प्रमुख उपाध्याय कहलै, ‘एसपीएसे खेल ओ खेलाडीहे सदैव उच्च सम्मान करटी आइल बा । यी बार चेलीहुकनहे प्रोत्साहित करे पाईबेर हम्रे बहुट गौरवाम्वित बटी ।’
सम्मान ग्रहणपाछे कविता कुँवरसे अपने पढटी रहल कलेजसे सम्मानित हुके गौरव महसुस हुइल बटैली ।
‘कलेजसे हम्रहिनहे सदैव साथ डेटी आइल बा । हरेक टुर्नामेन्ट आघे आर्थिक तथा भौतिक सहयोगफे करले बा,’ कविता कहली, ‘यी बार रजत जयन्तीके विशेष समारोहमे हम्रहिनहे सम्मान करेबेर एकदमे गौरवाम्वित हुइल बटी । सक्कु खेलाडीके ओरसे क्याम्पस परिवारप्रति आभार व्यक्त करटी ।’
एसपीएसे सदैव परल बेला सहयोग करल ओरसे अपन रोजाईमे यिहे कलेज परल कविता बटैठी ।
‘एसपीएसे हम्रे खेलाडीहे हरेक क्षेत्रमे मजा करले बा । हम्रहिनहे अध्ययनसंगे खेल आघे बहै्रना चहना सक्कु छोट छोट बाटमे सहयोग करले बा ।,’ कविता कहठी, ‘हम्रहिनहे अवसर, खेल सामाग्री, अप्ठारो परल बेला आर्थिक सहयोग करले बा । ओस्टेक छात्रवृत्ति समेत उपलब्ध कराके हम्रनिहे अध्ययनआघे बहै्रना सहयोग पुगैले बा ।’
ओइनेसंगे एसपीएसे मलेसियामे दुईवर्षआघे सम्पन्न पाँचौ गोजुरियो विश्व कराँते च्याम्पियनसीपमे नेपालके लाग रजत पदक जिटल कमल ओलीहेफे नगदसहित सम्मान करल रहे ।
एसपीएमे ८ जाने केल अन्तर्राष्ट्रिय क्रिकेट खेलाडी अध्ययनरत बटै । ओइनहे कलेजसे छात्रवृत्तिमे अध्ययनके व्यवस्था मिलाइल बा ।
एसपीएसे खेलकुदहे विशेष प्राथमिकता डेटी आइल बा । धनगढीहे क्रिकेटके शहरके रुपमे चिनैना श्रेय एसपीएके प्रवन्ध निर्देशक सुवास शाहीहे जाइठ । शाहीके अग्रसरतामे एसपीए कप, डीपीएल जैसिन फ्रेन्चाइजी क्रिकेट प्रतियोगिताके सुरुवात हुइल रहे ।
