बरघर ऐन ओ कार्यविधिबारे छलफल

पहुरा समाचारदाता
हसुलिया, १५ फागुन । कैलालीके कैलारी गाउँपालिकामे बरघर ऐन ओ कार्यविधिबारे छलफल कैगिल बा ।

लाहुर्निपके आयोजनामे कैलारीमे बरघर ऐन, कार्यविधिके अवस्थाबारे गाउँपालिकाके अध्यक्ष राजसमझ चौधरी, गाउँपालिका उपाध्यक्ष भगवती कुमारी चौधरी, प्रमुख प्रशासकीय अधिकृत विरबहादुर ऐर ओ वडा नम्बर १ से ९ समके वडा अध्यक्षहुकनसे छलफल कैगिल हो । कैलारी गाउँपालिकासे बरघर÷भल्मन्सा प्रणाली संरक्षण प्रवद्र्धन ओ विकास ऐन २०७८ बना सेकल प्रमुख प्रशासकीय अधिकृत विरबहादुर ऐर बटैलै ।

छलफल कार्यक्रममे गाउँपालिका राजसमझ चौधरी ऐन बनसेकल ओरसे आबसे कार्यविधि बनाके भल्मन्साहुकनहे छोट–छोट विवादके जिम्मा लगाई सेक्ना बटैलै ।
उहाँ कहलै, ‘थारु समुदायमे बरघर÷भल्मन्सा प्रथा परम्परासे चल्टी आइल बा । यी हमार संस्कार, पहिचान हो । यिहीसे बचैनाफे जरुरी बा । गाउँपालिकासे कार्यविधि हाली बनाईसेक्लेसे बरघर÷भल्मन्साहुकनहे कार्यविधि ओ ऐनमे रहल व्यवस्था अनुसार कानूनी रुपमे मुद्दा मिलैना जिम्मा डेहे सेक्जाइट ।’

गाउँपालिका उपाध्यक्ष तथा न्यायिक समिति संयोजक भगवतीकुमारी चौधरी गाउँघरमे हुइना छोट–छोट विवादके मुद्दामे दर्ता हुइटी रहल बटैली । बडघर ऐन संचालन कार्यविधि बनैले मुद्दामे चाप घटाई सेक्ना उहाँ बटैली ।
वडा नम्बर ५ के वडा अध्यक्ष विष्णु प्रसाद चौधरी विवादसे लेके विकासके काममे बडघर÷भल्मन्साहुक्रे निशुल्क रुपमे समाजसेवा करटी आइल बटैलै । गाउँपालिकासे भल्मन्साहुकनहे संचारखर्चके व्यवस्था करल ओ परिचयपत्रफे डेना तयारी करल बटैलै ।

उहाँ कहलै, हम्रे भल्मन्साहुकनसे विवरण, नागरिकताके फोटोकपी, फोटो लगायतके विवरण मग्ले बटी । सक्कु ओरसे विवरण अइलेसे परिचयपत्रफे डेजाई ।’
गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम थारु समुदायके बडघर÷भल्मन्साहुक्रे रिति संस्कृति जोगैनामे महत्वपूर्ण भुमिका निर्वाह करल बटैलै । विकासके काममे भल्मन्साहुक्रे निशुल्क सेवा करटी आइल ओरसे प्रथाहे जोगैना सक्कु जाने लागे पर्ना बटैलै ।

छलफल कार्यक्रममे लाहुर्निपके अध्यक्ष दिनेश घले बडघर ऐन संविधानसे नइबझना, अन्तर्राष्ट्रिय कानूनसे नइबझना मेरके छलफल करके नाने पर्ना बटैलै । उहाँ कहलै, थारु समुदायके बडघरहुक्रे जलमसे लेके भोजविहा, मरणीकरणीसे लेके विकासके काममे सहयोग करटी आइल ओरसे जोगैना आवश्यक बा ।’

छलफलमे लाहुर्निपके दुर्गा यम्फु राई, अधिवक्ता जोहारीलाल चौधरी, थारु नागरिक समाज कैलालीके संयोजक दिलबहादुर चौधरी, थारु कल्याणकारिणी सभा कैलालीके कार्यवाहक सभापति माधव चौधरी बरघर ऐन सहित कार्यविधि बनैनाबारे आ आपन सल्लाहसुझाव डेहल रहिट ।

छलफल कार्यक्रममे कैलारी गाउँपालिका वडा नम्बर १ के अध्यक्ष धोजहरिपाल बोहरा, २ के अध्यक्ष विकास चौधरी, ३ के अध्यक्ष सन्तराम चौधरी, ४ के अध्यक्ष ठागुराम चौधरी, ५ के अध्यक्ष विष्णु प्रसाद चौधरी, ६ के अध्यक्ष प्रेमबहादुर चौधरी, ७ के अध्यक्ष दिपेन्द्रबहादुर बम, ८ के अध्यक्ष तारामल कठरियाके सहभागितामे ऐनके अवस्था ओ कार्यविधिबारे छलफल हुइल रहे । ओस्टेक करके लाहुर्निपसे भजनी नगरपालिकामेफे बडघर ऐनबारे छलफल करले बा । कलेसे कैलारी ओ भजनीके बडघरहुकनसेफे अन्तरक्रिया करले बा ।