सडक स्तरोन्तीके अनुगमन
पहुरा समाचारदाता
हसुलिया, १६ फागुन । कैलालीके कैलारी गाउँपालिकामे कैगिल सडक स्तरोन्ती योजनाके गाउँपालिका स्तरीय अनुगमन समुहसे अनुगमन कैगिल बा ।
गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी सहित प्राविधिक टोलीसे मंगरके रोज सडक स्तरोन्ती योजनाके स्थलगत अनुगमन कैगिल हो ।
गाउँपालिका स्तरीय अनुगमन समुहसे कैलारी–६ स्थित बेनौली पक्की प्रतिक्षालयसे पुरान स्कूलसम सडक स्तरोन्तीके अनुगमन कैगिल हुइल बा । वडा नम्बर ८ लौसामे मनिराम कठरियाके पसलसे लाल बहादुर कठरियाके घरसम सडक स्तरोन्तीके काम हुइल बा । कलेसे सुर्मीसे दुधिया गाउँ जोरना सडकके स्तरोन्तीके अनुगमन हुइल बा ।
ओस्टेक करके कैलारी–८ मे गैल बर्षसे श्रमशिल कृषि सहकारी संस्थासे लिमिटेडसे सुरुवाट करल गारमेन्ट उद्योगके अनुगमनफे करल योजना शाखा प्रमुख सन्तोषकुमार चौधरी बटैलै ।
अनुगमन टोलीमे गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी, पूर्वाधार विकास समिति संयोजक तथा वडा नम्बर ६ के अध्यक्ष प्रेमबहादुर चौधरी, समितिके सदस्य तथा वडा नम्बर ९ के अध्यक्ष खेमराज चौधरी, वडा नम्बर ८ के वडा अध्यक्ष तारामल कठरिया, योजना शाखा प्रमुख सन्तोषकुमार चौधरी, सदस्य सुनिलादेवी चौधरी ओ सब ओभरसियर निर्मल चौधरीलगागतके सहभागिता रहे ।
