सीमान्तकृत महिलाहुकनहे सचेतनामुलक कार्यक्रम

पहुरा समाचारदाता
हसुलिया, १६ फागुन । कैलालीके कैलारी गाउँपालिका–४ के सीमान्तकृत महिलाहुकनके विच सचेतनामुलक कार्यक्रम कैगिल बा ।

मानव अधिकारका लागि एकल महिला समुह प्रदेश कार्यालय धनगढीके आयोजना तथा कैलारी गाउँपालिका वडा नम्बर ४ के कार्यालयके सहयोगमे सीमान्तकृत महिलाहुकनविच सचेतनामुलक कार्यक्रम कैगिल हो । कार्यक्रममे मानव अधिकारका लागि एकल महिला समुह प्रदेश कार्यालय धनगढीके परियोजना अधिकृत वेद अवस्थी, प्रदेश अध्यक्ष सुमन शर्मा, वडा नम्बर ४ के वडा सचिव श्री प्रसाद चौधरी सहजीकरण करल रहिट ।

कार्यक्रममे घरेलु हिंसा तथा लैङिक हिंसा, यौन जन्य हिंसा, मानसिक हिंसा, आर्थिक हिंसा, घरेलु तथा लैङिक हुइलेसे का कैना, बजेट विनियोजना, योजना छनौट प्रक्रियाबारे प्रशिक्षण डेगिल बा ।

मानव अधिकारका लागि एकल महिला समुह प्रदेश कार्यालय धनगढीके परियोजना अधिकृत वेद अवस्थी गाउँघरमे हिंसामे परल डिडीबहिनीयाहुक्रे अभिनफे पीडा नुकाके बैठना प्रचलन रहल बटैली । उहाँ कहली, ’हम्रे हिंसामे परल बटी कलेसे सरोकार निकायमे जाके अपन बाट राखी । मनमे डबाके धरलेसे उल्टे डिप्रेसनके शिकार बने सेक्ठी ।’ सीमान्तकृत महिलाहुक्रे अभिनफे आर्थिक रुपमे कम्जोर हुइलक कारण घरपरिवार, समाज गोसियासे आर्थिक ओ मासिक यातना भोगे पर्ना बाध्यता रहल उहाँ बटैली । आर्थिक रुपमे सम्पन्न महिलाके घरपरिवार समाजमे मानसम्मान रहना मने आर्थिक अवस्था कम्जोर रहल महिला सबसे हेप्ना ंिहसा कैना करल उहाँ बटैली ।

मानव अधिकार लागि महिला एकल महिला समुहके प्रदेश अध्यक्ष सुमन शर्मा यी संस्था वि.स २०५२ सालमे स्थापित हुके एकल महिलाके हक अधिकार तथा सशक्तीकरणके लाग वकालत कैना गैर सरकारी सामाजिक संस्था रहल बटैली । यी संस्था स्थापना कालसे एकल महिलाहुकनके सवालहे स्थानीयस्तरसे लेके क्षेत्रीय, राष्ट्रिय तथा अन्तर्राष्ट्रिय स्तरसम वकालत तथा पैरवी करटी आइल उहाँ बटैली ।

कार्यक्रममे कैलारी गाउँपालिका वडा नम्बर ४ वडा अध्यक्ष ठागुराम चौधरी वडासे सीमान्तकृत महिलाहुकनके अइना दिनमे सीपमुलक तालिमके लाग बजेट विनियोजन कैना बटैलै । उहाँ कहलै, गाउँघरमे अभिनफे महिलाहुक्रे बोले नइसेक्ना, हिंसामे परलबेला कहाँ उजुरी कैना बाट पत्ता नइहुइल ओरसे सचेतनामुलक कार्यक्रमके लाग सहयोग करल बटैलै । कार्यक्रममे सीमान्तकृत मुक्तकमैया महिला समूहके ७० जानेक सहभागिता रहल रहे ।