सुदूरपश्चिमके मुख्यमन्त्री शाह २१ गतेभिटर विश्वासके मत लेना
पहुरा समाचारदाता
धनगढी,१७ फागुन । सुदूरपश्चिम प्रदेशके मुख्यमन्त्री कमलबहादुर शाह प्रदेशसभासे विश्वासके मत लेना तयारी सुरु करले बटै ।
मुख्यमन्त्री शाह यिहे फागुन २१ गतेभिटर प्रदेशसभामे विश्वासके मत लेना तयारीमे रहल उहाँक सचिवालयसे जनैले बा । विश्वासके मतके लाग उहाँ पछिल्का दिनमे दलके शीर्ष नेतृत्वसे सत्ता साझेदार दल नेकपा (एकीकृत समाजवादी), नेकपा (माओवादी केन्द्र) ओ नागरिक उन्मुक्तिसँग भेटघाट एवं छलफलहे तीव्रता डेले बटै ।
मुख्यमन्त्री शाह कुछ दिन आघे काठमाडौँ पुगके प्रधानमन्त्री पुष्पकमल दाहाल ‘प्रचण्ड’ ओ नेपाली कांग्रेसके सभापति शेरबहादुर देउवासंग भेटवार्ता करके लौटल बटै । विश्वासके मत लेहक लाग सभामुखसंग मुख्यमन्त्री शाह आवश्यक परामर्श करटी रहल बटै । प्रदेशसभामे एमाले बाहेकके दलसंगके छलफलहे समेत तीव्रता डेहल बा,’ मुख्यमन्त्रीके स्वकीय सचिव धीरेन्द्र शाही कहलै, ‘ गत माघ २६ गते मुख्यमन्त्रीमा नियुक्त हुइल उहाँ यिहे फागुन २६ गतेभिटर विश्वासके मत लेसेके पर्ना बा । प्रदेशसभामे कांग्रेस संसदीय दलके नेता शाह एकीकृत समाजवादीके करके २३ प्रदेशसभा सदस्यके समर्थनमे मुख्यमन्त्रीमे नियुक्त हुइल रहिट । उहाँहे विश्वासके मत पैना २७ सदस्यके समर्थन आवश्यक परी ।
त्रिपन्न सदस्यीय सुदूरपश्चिम प्रदेशसभामे कांग्रेसके १९, एमालेके १०, माओवादी केन्द्रके ९, नागरिक उन्मुक्तिके सात, एकीकृत समाजवादीके चार तथा राप्रपा ओ स्वतन्त्र करके एक÷ एक सदस्य बटै ।
पछिल्का बार केन्द्रमे फेरल समीकरणसंग्गे मुख्यमन्त्री शाह प्रदेशसभामे विश्वासके मत पैनामे ढुक्क रहल उहाँक स्वकीय सचिव शाहीके दाबी बा । गैल अगहन ४ गते सम्पन्न चुनावलगत्ते मुख्यमन्त्रीमे नियुक्त हुइल एमाले संसदीय दलके नेता राजेन्द्रसिंह रावल तोकल समयभिटर प्रदेशसभामे विश्वासके मत पैना असफल हुइलपाछे उहाँ पदसे राजीनामा डेले रहिट । एमाले, माओवादी केन्द्र, नागरिक उन्मुक्ति ओ राप्रपा करके बहुमत सदस्यके समर्थनमे एमालेके रावल मुख्यमन्त्री नियुक्त हुइल रहिट । नागरिक उन्मुक्तिसे विश्वासके मत डेहे नइमानलपाछे रावल पदमुक्त हुइल रहिट ।
