‘गुणस्तरीय शिक्षासंग्गे विद्यार्थी एकतृत आवश्यक’
पहुरा समाचारदाता
धनगढी, १८ फागुन । सिकाइ तथा विकास स्तर मापन ओ सुधारात्मक सिकाइ सहयोग सम्बन्धी कष्टमाइज तालिम बुधके रोज धनगढीमे सम्पन्न हुइल बा ।
कक्षा १ मे शिक्षण कैना शिक्षकहुकनहे बालबालिकाके स्तर मापन करके सुधारात्मक शिक्षण विधि अपनाके एकिकृत पाठ्यक्रम अनुसार सिकाई सहजीकरणमे सहयोग पुग्न उद्देश्यसे तालिमके आयोजना कैगिल रहे ।
युनिसेफ नेपालके आर्थिक सहयोग, सेतो गुराँस राष्ट्रिय वालविकास सेवा, पीसवीन नेपालके प्राविधिक तथा कैलारी गाउँपालिकाके समन्वय ओ सहकार्यमे सञ्चालित ‘नेपालमे प्रारम्भिक बालशिक्षा र विकासको सवलीकरणका लागि प्रारम्भिक सिकाइ तथा विकास मापदण्ड कार्यान्वयन परियोजना’ दुई चरणमे यिहे फागुन १० गतेसे सुरु हुइल तालिममे कैलारी गाउँपालिकास्थित सामुदायिक विद्यालयके ४४ जाने कक्षा १ के शिक्षकहुकनके सहभागिता रहे । पहिल चरणके तालिम फागुन १० से १३ गतेसम ओ दुसर चरणके तालिम १४ गतेसे १७ गतेसम संचालन हुइल रहे । उ तालिमके सहजीकरण पीसविन जिल्लाके जिल्ला कार्यक्रम संयोजक शान्ती मगर ओ जिल्ला कार्यक्रम अधिकृत जानकी सिंह सहजीकरण करल रहिट ।
तालिम समापन कार्यक्रम कैलारी गाउँपालिकाके उपाध्यक्ष भगवतीकुमारी चौधरीके वडका पहुनामे हुइल रहे । कार्यक्रममे सम्बोधन करटी उहाँ सामुदयिक विद्यालयमे गुणस्तरीय शिक्षा प्रदान कैनाके साथे अब्बे विद्यार्थी एकातृत कैना आवश्यक रहल बटैली । उहाँ कहली, ‘पहिलेक तुल्नामे अब्बे सामुदायिक विद्यालयके शैक्षिक गुणस्तरमे सुधार हुइटी गैल बा । शिक्षकहुक्रे लेहल तालिम अनुसार विद्यालयमे मेहनत कैडेलेसे विद्यार्थीके शिक्षण सिकाईमे बृद्धि हुई ।’ गाउँपालिकासे कक्षा कोठा व्यवस्थापन, शिक्षण सामाग्रीमे सदैव सहयोगफे उहाँ बटैली ।
कार्यक्रममे विशिष्ट पहुना कैलारी गाउँपालिका शिक्षा शाखा प्रमुख गणेश प्रसाद मिश्र बालबालिकाके जग बल्गर बनाइक लाग कार्यक्रम लागु करल बटैलै । शैक्षिक गुणस्तर परिक्षण केन्द्रसे करल अध्ययनसे कक्षा १ ममे भर्ना हुइना ५६ प्रतिशत बालवालिकासे केल प्रारम्भिक सिकाइ तथा विकास मापदण्डके सुचक हासिल करल पाइल ओरसे कक्षा १ मे शिक्षण कैना शिक्षकहुक्रेफे बालवालिकाके सिकाइ तथा विकास मापदण्डके बारेमे जानकार हुइना आवश्यक रहल बटैलै ।
कार्यक्रमके विशिष्ट पहुना शिक्षा तालिम केन्द्र दिपायलके प्रमुख गोविन्द प्रसाद पोखरेल तालिमहे अवसरमे रुपमे लेटी शिक्षकसे बालबालिका ओ अभिभावक मन जिटे पर्ना बटैलै । उहाँ कहलै, ‘बालबालिका अपन डाई बाबा छोरके विद्यालय अइना ओरसे शिक्षकहुकनसे ओइनहे सहजुले सिख्ना बातावरण बनैना आवश्यक रहठ ।’
शिक्षक जितेन्द्र चौधरी तालिमसे प्राप्त ज्ञानसीपसे बालबालिकाहुकन अध्यापन कैनामे सहयोग पुग्ना बटैलै ।
तालिम समापन कार्यक्रम पीसविन कैलालीके अध्यक्ष कमला बुढाथोकीके अध्यक्षतामे हुइल रहे । कार्यक्रममे बोल्टी उहाँ तालिममे पाइल सीपसंग्गे शिक्षकहुकनके जिम्मेवारी बह्रल बटैली । उहाँ कहली, ‘अब्बेक विद्यार्थीन कुटपिट कैके, डर डेखाके पह्रैना समय नइरहिगिल । आब टे कक्षा कोठामे व्यवस्थान, टमान सामाग्री, विधि प्रक्रिया ओ तनावमुक्त बातावरणमे पहै्रना समय हो ।’
बाल विकासहे बल्गर बनाइसेक्लेसे पाछेसम शिक्षामे गुणस्तर नाने सेक्नाफे उहाँ बटैली । कार्यक्रमके सचिव बसुन्धरा प्रसाद भट्ट करले रहिट । तालिम समापन कार्यक्रममे सामाजिक विकास मन्त्रालयके शाखा अधिकृत गोपालदत्त जोशी, पीसविनके प्रदेश संयोजक जुद्ध रावल, जिल्ला सदस्य हर्कबहादुर ओली लगायतके सहभागिता रहल रहे ।
